Косово шимолида қайтадан бошланган норозилик намойишлари фонида НАТО альянс бошчилигидаги KFOR тинчликпарвар миссияси доирасида минтақага қўшимча кучлар юборишга қарор қилди. Дпа агентлиги Брюсселдаги ҳарбий суҳбатдошларига таяниб ёзишича, қўшимча кучлар 700 га яқин аскардан иборат бўлади. Ҳозирда Косовода KFOR миссияси доирасида 3 800 нафар тинчликпарвар кучлар бор.
Шимолий Атлантика альянси Косовога қўшимча кучларнинг биринчи қисми етти кун ичида жойлаштирилишини маълум қилди. Агар бу етарли бўлмаса, тезкор захирадаги бошқа батальонга юқори шай ҳолатга ўтиш буюрилди.
“Тинчликпарварлар сонининг кўпайиши KFOR’нинг Бирлашган Миллатлар Ташкилоти Хавфсизлик Кенгаши мандатига мувофиқ (Косовода) хавфсизликни таъминлаш учун етарли кучларга эга бўлиши учун зарур”, — деди НАТОнинг Неаполдаги иттифоқчи кучлар қўмондонлиги раҳбари Стюарт Манш.
Косоводаги тартибсизликларда 25 нафар тинчликпарвар яраланди
Ҳафта бошида Косово шимолидаги маъмурий биноларга этник серблар томонидан уюштирилган ҳужумлар оқибатида камида 50 нафар намойишчи ва KFOR тинчликпарвар миссиясининг 25 га яқин вакили жароҳатланган. KFOR қўшимча кучлари республика шимолига, жумладан, Звечан шаҳрига жўнатилди — у ерда 26 май куни серблар янги мерни шаҳар мериясига кузатиб бораётган полицияга ҳужум қилган. Косово ҳуқуқ-тартибот ходимлари намойишчиларга қарата кўзни ёшлатувчи газ ишлатган. KFOR кучлари полицияга маъмурият биносини қўриқлашда ёрдам беришда давом этмоқда.
Европа Иттифоқи Косоводаги зўравонликни қоралади ва томонларни кескинликни камайтиришга чақирди. Германия ташқи ишлар вазирлиги ҳам худди шундай баёнот билан чиқди.
Изоҳ (0)