Туркияда қайта сайланган президент Ражаб Тоййиб Эрдўғоннинг инаугурацияси ўтказилгандан сўнг Россия ва Украина президентлари Владимир Путин ва Владимир Зеленский Туркияга ташриф буюришни режалаштирмоқда. Бу ҳақда Hurriyet манбаларига таяниб хабар берди.
Газета инаугурация маросимида иштирок этиш учун кўплаб хорижий етакчилар Туркияга келишини таъкидлади. Ўз навбатида Владимир Путин “алоҳида ташриф” уюштирмоқчи, ундан кейин Владимир Зеленский Туркияга боради, дейилади хабарда. Нашрнинг ёзишича, Россия ва Украина президентларининг ташрифи чоғида урушнинг бориши ҳамда ғалла келишуви муҳокама қилинади.
Туркиядаги президентлик сайловларининг иккинчи босқичида Ражаб Тоййиб Эрдўғон 4 фоизлик фарқ билан ғалаба қозонди. Президент маслаҳатчиси Меҳмет Учум, агар Олий сайлов комиссияси 1 июнга қадар якуний сайлов натижаларини эълон қилса, Эрдўғоннинг инаугурация маросими 3 июнь куни бўлиши мумкинлигини айтди.
Россия президент матбуот котиби Дмитрий Песков Владимир Путин туркиялик ҳамкасбининг инаугурациясига борадими, деган саволга жавобан ушбу тадбирга хорижлик етакчилар таклиф қилинганидан хабари йўқлигини айтган. Украина томони ҳам ҳозирча Зеленскийнинг ташрифи ҳақида хабар бергани йўқ.
Изоҳ (0)