Соғлиқни сақлаш вазири Амрилло Иноятов АҚШнинг Ўзбекистондаги фавқулодда ва мухтор элчиси Жонатан Хеник билан учрашув ўтказди. Бу ҳақда ССВ матбуот хизмати хабар берди.
Қайд этилишича, мулоқот давомида АҚШ билан ҳамкорликда тиббиёт соҳасида янги лойиҳаларни молиялаштириш юзасидан ўзаро фикр алмашилган.
Хусусан, Ўзбекистонда фармакопеяни ривожлантириш ва референс лабораторияларни ташкил этиш бўйича грант маблағлари 2023 йил Соғлиқни сақлаш вазирлиги ва АҚШнинг Халқаро тараққиёт агентлиги (USAID) ўртасида имзоланадиган мақсадли келишувлар доирасида ажратилиши айтиб ўтилган.
Шу билан бирга, АҚШ Касалликларни назорат қилиш ва олдини олиш марказлари (CDC) билан гепатит касаллигини камайтириш, хасталикнинг А, B, C турларига қарши биргаликдаги ҳаракатларни кўзда тутадиган лойиҳаларни молиялаштириш ва грант маблағларини ажратишга ҳам келишиб олинган.
Учрашувда вазир Амрилло Иноятов ва элчи Жонатан Хеник ўртасида тиббиёт мутахассислари малакасини ошириш, кадрлар алмашиш ва тиббий таълим соҳасида грант маблағларини ажратиш истиқболлари атрофлича муҳокама қилинган. Якунда шу йил мамлакатда Ўзбекистон—АҚШ халқаро тиббиёт форумини ўтказиш режалаштирилган.
2022 йил март ойида АҚШ Халқаро тараққиёт агентлиги (USAID) томонидан сўнгги олти ой давомида Ўзбекистонга умумий қиймати қарийб 700 минг долларга тенг туберкулёзни тезкор диагностика қилишга мўлжалланган GeneXpert тизимлари беғараз тақдим этилгани маълум бўлганди. 2023—2026 йилларда дори ва сарфлов воситалари, тиббий техника, мутахассислар тайёрлаш ва инновацион илмий изланишларга давлат бюджетидан 33 миллион, халқаро донорлар ҳисобидан эса 26,5 миллион доллар миқдорида маблағ ажратилиши кўзда тутилган.
Изоҳ (0)