Сурхондарё вилоятининг Сариосиё туманида маст эркак болта билан профилактика инспекторига ҳужум қилди. Бу ҳақда ИИВ матбуот хизмати хабар берди.
Маълум қилинишича, 30 май куни соат 16:00 да тумандаги “Ҳамкорлик” маҳалласи раисининг уйига шу маҳаллада яшовчи, муқаддам бир неча маротаба ўғрилик ва гиёҳванд моддалар билан ноқонуний муомала қилиш жиноятларини содир этгани учун судланган, гиёҳванд шахс сифатида профилактик назоратга олинган А.И. (1976 йилда туғилган) маст ҳолда бостириб кириб, маиший муаммоларини рўкач қилган ҳолда маҳалла раиси ва уйда бўлган оила аъзолари тинчлигини бузиб, жанжал кўтарган.
Чақирувга асосан воқеа жойига етиб келган маҳалла профилактика инспектори капитан Ғофур Бердиев тартиббузар фуқаро воқеа жойидан номаълум томонга қочиб кетганига гувоҳ бўлган.
Олиб борилган қидирув тадбирлари натижасида шу куни соат тахминан 19:00 ларда тартиббузар А.И. ўз уйига қайтиб келгани аниқланиб, у билан профилактик суҳбат ўтказиш ҳамда маҳалла раисига нисбатан содир этган ҳуқуқбузарлик ҳолатини расмийлаштириш мақсадида унинг хонадонига борган инспектор хонадон эгасининг кескин қаршилигига учраган.
Хонадон эгаси болта билан унга ҳужум қилиб, унинг чап қўл тирсагини яралаган. Шунга қарамай, инспектор жисмоний куч ишлатиб, ҳуқуқбузарни зарарсизлантирган.Шундан сўнг инспектор хонадон қўшнилари ва воқеа жойига етиб келган ҳамкасблари ёрдамида шифохонага етказилган.
Тиббий кўрик натижасида чап тирсак пастки қисми суякларининг очиқ сингани ва қон томирлари кесилиши оқибатида кўп қон йўқотгани аниқланиб, тезкорлик билан тегишли муолажалар кўрсатилган.
Ҳозирда мазкур ҳолат юзасидан Сариосиё тумани прокуратураси томонидан тегишли моддалар билан жиноят иши қўзғатилиб, гумонланувчи шахс процессуал тартибда қамоққа олинган.
Ҳаётини хавф остига қўйиб жиноятчини зарарсизлантирган профилактика инспекторини эса рағбатлантириш масаласи кўрилмоқда.
Изоҳ (0)