Европа Иттифоқи Косово шимолидаги Звечан шаҳрида содир бўлган “шокка солувчи зўравонлик”ни қатъий қоралайди. Бу ҳақда 30 майга ўтар кечаси Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррель Twitter’да ёзди.
“KFOR (НАТО бошчилигидаги халқаро тинчликпарварлик миссияси), оммавий ахборот воситалари вакиллари, тинч аҳоли ва полицияга қарши зўравонлик ҳаракатларига мутлақо йўл қўйиб бўлмайди”, — дейилади унинг твитида.
“Европа Иттифоқи Косово ҳукумати ва намойишчиларни кескинликни зудлик билан ва сўзсиз пасайтиришга чақиради. Биз томонлардан масъулият билан иш кўриш ва муаммога мулоқот орқали дарҳол сиёсий ечим топишни кутамиз”, — деб ёзди Боррель.
Бунга қадар Германия ташқи ишлар вазирлиги ҳам Косово шимолидаги кескинликни камайтиришга чақириб, Звечан ва бошқа шаҳарларда содир этилган зўравонлик ҳаракатларини “номақбул” деб атаган эди. Берлин Белград ва Приштинани вазиятни кескинлаштириш ва Европа Иттифоқи шафелигида февраль ва март ойларида эришилган муносабатларни нормаллаштириш бўйича келишувларни амалга ошириш бўйича музокаралар олиб боришга чақирди.
Косовода 25 нафар тинчликпарвар яраланди
Косово шимолидаги маъмурий биноларга этник серблар томонидан уюштирилган ҳужумлар оқибатида камида 50 нафар намойишчи ва KFOR тинчликпарвар миссиясининг 25 га яқин вакили жароҳатланган. KFOR қўшимча кучлари республика шимолига, жумладан, Звечан шаҳрига жўнатилди — у ерда 26 май куни серблар янги мерни шаҳар мериясига кузатиб бораётган полицияга ҳужум қилган. Косово ҳуқуқ-тартибот ходимлари намойишчиларга қарата кўзни ёшлатувчи газ ишлатган. KFOR кучлари полицияга маъмурият биносини қўриқлашда ёрдам беришда давом этмоқда.
Изоҳ (0)