Косово шимолидаги тўқнашувлар чоғида 50 дан ортиқ киши жароҳатланди, дея хабар бермоқда ОАВ шифокорларга таяниб.
Бугун тунда Звекан муниципалитетида тартибсизликлар бошланди. Серблар маҳаллий ҳокимият биноси олдига йиғилди. Улар Косово полициясини олиб чиқиб кетишни ва косово-албан мэрини чақириб олишни талаб қилишди. Уларнинг бинога яқинлашишига Косово полицияси ва НАТО қуролли кучлари тўсқинлик қилган. Хавфсизлик кучлари намойишчиларга қарши куч ишлатган, дубинкаларни қўллаган, кўздан ёш оқизувчи газ сепган ва оломонга 30 га яқин шовқинли гранаталар улоқтирган.
Апрель ойи охирида маҳаллий серблар томонидан бойкот қилинган Шимолий Косово ва Метохиядаги тўртта муниципалитетда маҳаллий сайловлар бўлиб ўтди. Сайловчилар сони тўрт фоизга ҳам етмаган бўлса-да, асосан серблардан иборат Шимолий Митровица, Звекан, Зубин Поток ва Лепосавичда албан номзодлари ғалаба қозонди. Ўтган ҳафта Приштина янги мерларни лавозимга тайинлашга уриниб кўрди, бу эса навбатдаги кескинликни келтириб чиқарди.
26 май куни косово-албан полицияси Лепосавич, Зубин Поток ва Звекан шаҳарларидаги муниципал биноларни зўрлик билан эгаллаб олди. Серблар хавфсизлик кучлари ва амалдорларнинг кириб келишига тўсқинлик қилишга уринган, тўқнашувлар содир бўлган, полиция ҳаракатлари натижасида ўн киши жароҳатланган.