Президентнинг кутилмаган ташрифидан кейин мактабда супурувчи бўлиб ишловчи фуқаронинг уйи таъмирлаб берилди (фото)

Президент Шавкат Мирзиёевнинг Тошкент шаҳри Учтепа туманига қилган ташрифидан кейин мактабда супурувчи бўлиб ишловчи Александр Соколовнинг уйи таъмирлаб берилди. Бу ҳақда Уй-жой коммунал хизмат кўрсатиш вазирлиги ахборот хизмати “Дарё”га маълум қилди.

Кутилмаган ташриф

Президент Шавкат Мирзиёев 2022 йилнинг 13 декабрь куни Учтепа туманига қилган ташрифи чоғида кўп қаватли уйлар ва уларнинг атрофи қай даражада ободонлаштирилганини кўздан кечирган эди. Ўшанда давлат раҳбари аввалдан режалаштирилмаган ҳолда хонадонлардан бирининг соҳиби билан кўрсатилаётган коммунал хизматлар сифати ҳақида суҳбатлашганди.

Президент билан учрашган хонадон эгаси Александр Соколовнинг айтишича, президентнинг ташрифи олдиндан режалаштирилмаган ва у буни кутмаган.

“Шавкат Мирзиёев исталган хонадонга кириши мумкин эди. Мендан иссиқлик тизими ҳақида сўради. Президент менга ҳаммаси яхши бўлади, деб айтди. Шокка тушиб қолган эдик. Ҳамма учун кутилмаган ҳолат бўлди. Президентни яқиндан кўрдим, қўл бериб кўришдим”, — деди хонадон эгаси.

У уйи яқинидаги мактабларнинг бирида ҳовли супурувчи бўлиб ишлайди.

“Учрашувдан кейин атрофдагиларнинг менга муносабати ўзгарди. Учта фарзандим бор. Болаларим катта: ўқийди, ишлайди”, — деди Александр Соколов.

Уй таъмирлаб берилди

Александр Соколов кўп қаватли уйда 3 хонали хонадонда уч фарзанди билан яшаб келган. Унинг хонадони таъмирталаб бўлгани боис ташрифдан сўнг 2022 йилнинг декабри охирида ҳокимлик томонидан таъмирлаш ишлари бошланган. Оила бир муддатга бошқа жойга вақтинча кўчириб турилган.

Уй-жой коммунал хизмат кўрсатиш вазирлиги ахборот хизматининг “Дарё”га маълум қилишича, таъмирлаш ишлари февраль ойи охирида ўз ниҳоясига етган. Айни вақтда оила ўз хонадонида яшамоқда.