Toshkentdagi maktabda 9- va 7-sinf o‘quvchilari o‘rtasida mushtlashuv sodir bo‘ldi
Toshkent shahar Yashnobod tumanidagi maktablarning birida 9- va 7-sinf o‘quvchilari o‘rtasida janjal sodir bo‘ldi. Bu haqda Maktabgacha va maktab ta’limi vazirligi axborot xizmati xabar berdi.
Unga ko‘ra, holat 24-may kuni 161-maktabda darsdan keyin, taxminan soat 13:00 larda sodir bo‘lgan. 9-sinf o‘quvchisi T.A. 7-sinfning uch nafar o‘quvchisi bilan tortishib qolgan va janjallashgan. O‘sha mahalda 9-sinf o‘quvchilari So‘nggi qo‘ng‘iroq tadbiri badiiy dasturi uchun tayyorgarlik ko‘rishayotgan bo‘lgan. O‘quvchi T.A. mashg‘ulotimizga xalaqit qildinglar, deb 7-sinf o‘quvchilarini haqorat qilgan.
Natijada uch nafar o‘quvchi T.A. bilan mushtlashib qolgan. Voqeadan xabar topgan maktab ma’muriyati, sinf rahbarlari shu zahotiyoq janjalni to‘xtatib, o‘quvchilarni o‘zaro yarashtirib qo‘ygan. Hech kim jarohatlanmagan. Shundan so‘ng, 9-sinf o‘quvchilari repetitsiyani davom ettirgan va mashg‘ulotni tugatib, uylariga tarqalgan.
Qayd etilishicha, janjalda ishtirok etgan o‘quvchilar va ularning ota-onalari chaqirtirilib, ular bilan profilaktik tushuntirish ishlari olib borilgan. Hozirda yuqoridagi holat yuzasidan Yashnobod tuman IIO FMB tomonidan surishtiruv ishlari olib borilmoqda.
O‘quvchilar o‘rtasida mushtlashuvlar
2022-yilning oktabrida ijtimoiy tarmoqlarda Namanganning Kosonsoy tumanida maktab o‘quvchilari mushtlashuvi aks etgan tasvirlar tarqalgandi. Noyabrda esa Toshkentda o‘quvchilar futboldagi janjal sabab mushtlashib ketgan edi. Keyinroq poytaxt IIBB voqeaga munosabat bildirib, mazkur holat yuzasidan Yangihayot tumani IIO FMB tomonidan tekshiruv o‘tkazilayotganini ma’lum qilgan.
Shuningdek, Toshkentda maktab o‘quvchilari “Amerika kinosiga taqlid qilib” mushtlashuv uyushtirgani, Xorazm viloyati Urganch tumanida joylashgan ikki maktab o‘quvchisi o‘rtasida janjal sodir bo‘lgani to‘g‘risida xabar berilgandi.
