Самарқанд вилояти Мактабгача ва мактаб таълими бошқармаси ижтимоий тармоқларда тарқалган ўқувчи қизнинг “самосуд” қилингани акс этган видеога муносабат билдирди.

Қайд этилишича, видеодаги ҳолат 8 май куни Паяриқ туманидаги 58-умумий ўрта таълим мактабида содир бўлган. Мактабнинг 11 “Б”-синф ўқувчилари Р.Н. ва Ф.Д. соат 09:55 да, танаффус вақтида ўзаро тортишиб қолиши натижасида Р.Н. дугонаси Д.Ф.ни турли хил сўзлар билан ҳақоратлаган ва урган.

Ҳолат туман мактабгача ва мактаб таълими бўлими масъул ходимларидан иборат ишчи гуруҳи томонидан ўрганилган.

Олиб борилган ўрганишларга кўра, ўқувчиларни дарс машғулотларида назоратсиз қолдиргани, ўз лавозим мажбуриятларини тўлиқ бажармасдан сусткашликка ва масъулиятсизликка йўл қўйганликлари учун 58-умумий ўрта таълим мактабининг физика фани ўқитувчиси М.А.га, 11“Б”-синф раҳбари Н.Ғ., маънавий-маърифий ишлар бўйича директор ўринбосари Х.А. ва мактаб психологи Н.А.га нисбатан Меҳнат кодексининг тегишли моддасига асосан, “ҳайфсан” интизомий жазо чораси қўлланилган.

Ҳозирда мазкур ҳолат юзасидан Паяриқ тумани ИИБ томонидан суриштирув ишлари олиб борилмоқда.

“Самосуд” ҳолатлари

Апрель охирларида Ўзбекистонда наркозакладчикларни жазолаш билан шуғулланиб келган 20 киши қўлга олингани тўғрисида хабар берилганди. Шунингдек, Наманганда 21 ёшли йигит ўзидан кичик болалар томонидан “самосуд” қилингани, Россияда танишининг қулоғини кесиб ташлаган ўзбекистонлик эркакка ҳукм ўқилгани, Бухородаги тунги клубда эркак 2 кишини калтаклагани маълум бўлган эди.