Тошкент шаҳрида 24 май куни Ўзбекистон—Сингапур бизнес-форуми бўлиб ўтди. Бу ҳақда Инвестициялар, саноат ва савдо вазирлиги ахборот хизмати хабар берди.
Тадбирдан асосий мақсад иштирокчиларни мамлакатлар миллий иқтисодиётининг рақобатдош устунликлар ва драйверлари ҳақида хабардорлигини ошириш, шунингдек, икки давлат ҳукумати ва ишбилармон доиралари ўртасида янги ҳамкорлик алоқаларини ўрнатишдан иборат бўлди.
Бизнес-форумда Сингапур президенти Ҳалима Яқуб, Ўзбекистон бош вазири ўринбосари Жамшид Хўжаев, икки мамлакатнинг тегишли вазирлик ва идоралари, тармоқ бирлашмалари раҳбарлари, Meinhardt, PSA International, Wilmar International, “Чанги халқаро аэропорти”, EINZ Engineering & Construction, Lazada Group, MSI Global, Engarde Ventures, TMC каби йирик компаниялар раҳбарлари иштирок этди.
Жамшид Хўжаев бизнес-форум иштирокчиларига мурожаат қилиб, Ўзбекистон билан Сингапур ўртасидаги ҳамкорлик ривожланишининг ижобий динамикасини юқори баҳолади. У, шунингдек, Шавкат Мирзиёевнинг жорий йил 17 январдаги Сингапурга ташрифи икки мамлакат ўртасидаги ўзаро манфаатли муносабатларнинг янги саҳифасини очгани ва натижада 3,8 миллиард долларлик инвестиция лойиҳалари портфели шаклланганини қайд этди.
Сингапур ва Ўзбекистон ўртасидаги ташқи савдо муносабатлари ҳам изчил ривожланиб бораётгани таъкидланди. 2023 йил бошидан буён унинг ҳажми ўтган йилнинг шу даврига нисбатан бир неча баравар ўсди. Инвестиция соҳасидаги муносабатлар ва саноат кооперацияси йўналишида ҳамкорлик кенгайтирилмоқда. Сингапур капитали иштирокидаги қўшма корхоналар сони сўнгги етти йилда 3,5 баробар ошди.
Сингапурнинг йирик компаниялари билан “яшил” энергетика, қишлоқ хўжалиги, фармацевтика саноати, таълим, туризм, инфратузилмавий ривожланиш ва давлат компаниялари активларини хусусийлаштириш бўйича қўшма лойиҳалар амалга оширилмоқда ва ишлаб чиқилмоқда.
Ўзбекистонда инвестиция муҳитини яхшилаш бўйича амалга оширилаётган бир қатор вазифалар ҳақида сўз борди. Мамлакатда маъмурий ислоҳот амалга оширилди, ЖСТга аъзо бўлиш жараёни фаоллаштирилди, Конституцияга эркин фуқаролик жамиятини ривожлантириш, инсон капиталини мустаҳкамлаш, тадбиркорлик эркинлигини, инвесторлар ҳуқуқлари, хусусий мулк дахлсизлигини таъминлашга қаратилган қўшимча ва ўзгартиришлар киритилди.
Ўз навбатида, Сингапур президенти Ҳалима Яқуб сармоявий, савдо-иқтисодий ва саноат кооперациясидаги шериклик устувор аҳамиятга эга эканлигини таъкидлади. Сингапур президенти олий даражадаги ўзаро ташриф натижаларини юқори баҳолаб, муҳим йўналишлар бўйича ҳамкорликни янада мустаҳкамлашга содиқлигини билдирди.
Юқори мартабали меҳмонлар ишбилармон доира вакилларига мурожаат қилиб, ҳукумат вакиллари қўшма лойиҳа ва ташаббусларни амалга оширишни ҳар томонлама қўллаб-қувватлашга тайёр эканини яна бир бор тасдиқлади ҳамда компания ва корпорация раҳбарларини ҳамкорликни кенгайтиришга, ўзаро манфаатли янги шартнома ва битимлар тузишга чақирди.
Тадбир доирасида таълим, транспорт, шаҳарсозлик ва молиявий соҳаларда ҳамкорликни ривожлантириш масалаларига бағишланган панел мунозаралари ҳам бўлиб ўтди. Бизнес-форум якунида Ўзбекистон ва Сингапур ишбилармон доираларини қизиқтирган қатор йўналишлар бўйича мустаҳкам инвестициявий битим ва савдо шартномалари имзоланди.
Изоҳ (0)