ЕТТБнинг 32 йиллик йиғилиши доирасида Ўзбекистонда давлат банкларини трансформация қилиш жараёни бўйича махсус сессия бўлиб ўтди. Сессия спикерларидан бири, Президент ҳузуридаги Стратегик ислоҳотлар агентлиги бош директорининг биринчи ўринбосари Абдулла Абдуқодиров ва Осиё тараққиёт банкининг Марказий ва Ғарбий Осиёдаги департаменти Ўзбекистондаги доимий миссиясининг асосий операциялар бўйича мутахассиси Энрико Пинали мазкур жараёнлар юзасидан “Дарё” мухбирининг саволларига жавоб берди.
Иқтисодий ислоҳотлар бошланганига 5 йилдан ошган бўлса ҳам давлат банкларининг бозордаги улуши катталигича қолаётганини инобатга олиб, давлат банкларини хусусийлаштириш жараёни секин кечмаяптими деган саволга Абдулла Абдуқодиров қуйидагича жавоб берди:
“Бу масалага мен сал чуқурроқ қараган бўлар эдим. Биринчидан, биргина Миллийбанкни мисол қилиб оладиган бўлсак, 6 йил аввал унга банк секторидаги 50 фоиз капитал ва 75 фоиз активлар тўғри келар эди. Ҳозирги кунда Миллийбанкнинг улуши активлар бўйича 21 фоиз, капитал бўйича 21 фоиздан сал юқорироқ. Демак, бошқа банклар рақобатга киряпти.
(Банкларнинг) давлатга ёки хусусий секторга тегишли экани иккинчи даражали масала. Энг муҳими банклар ўртасида рақобат борми, банк соҳасида бизга керакли бўлган банк молиялаштириш инструментлари тўлақонли мавжудми, кейин рақамли банклаштириш борми, мана шу саволларга жавоб бериш керак. Кимнинг қўлига тегишли эканлиги иккинчи даражали масала.
Энг муҳими, молиявий секторда турли банк маҳсулотларига бўлган талаб етарли даражада қондириляптими, йўқми, мана шу”, — деди Абдулла Абдуқодиров.
Бироқ, иқтисодчининг қайд этишича, юқоридаги фикрлар давлат бу муаммони кўрмаётганини англатмайди.
“Лекин бу деганим, давлат бугунги кунда бу муаммони кўрмаяпти, буни инкор қилаяпти дегани эмас. Давлат айнан шунинг учун ҳам энг биринчи навбатда банкларда корпоратив бошқарув усулларини ўзгартиришга киришди ва уларни хусусийлаштиришга кенг йўл яратиб беряпти. Мана бугун ҳам ўзингиз кўрдингиз, эшитдингиз, чет элдан келган нуфузли мутахассислар банкларнинг кузатув кенгашларида аъзо бўлиб, ўз фикрларини етказиб беряпти ва бизнинг бошқарув усулларини бутунлай ўзгартиряпти.
Демак, банкда сиёсий ирода бор, техник жиҳатдан биз ўзимизга нима қилишимиз кераклигини белгилаб олганмиз ва буларни тўлақонли амалга оширамиз”, — деди иқтисодчи.
Осиё тараққиёт банкининг Марказий ва Ғарбий Осиёдаги департаменти Ўзбекистондаги доимий миссиясининг асосий операциялар бўйича мутахассиси Энрико Пинали эса банкларнинг хусусийлаштириш жараёни секин кечмаяптими деган саволга қуйидагича жавоб берди:
“Эътибор беринг, бу нотинч даврлар бўлди. Бизда аввал ковид бор эди, энди эса халқаро майдонда кескинликлар кузатиляпти. Бу жараён бир оз вақт олади. Чунки бу жараён банкни трансформация қилишни ҳам ўз ичига олади, трансформация эса муҳим нарса ва вақт талаб этади. Банкни хусусийлаштиришга тайёрлаш йўлида тўғри қадамлар қўйиш учун барчамиз биргаликда ҳаракат қиляпмиз.
Шуни ҳам тушунишингиз керакки, халқаро кескинлик туфайли ҳозир келиб сармоя киритишга тайёр инвесторлар кўлами унчалик катта эмас. Биз банк инвесторлар учун тайёр бўлишига, халқаро вазият яхшиланишига ва одамлар келиб, банкка сармоя киритиш қийматини аниқлашига ишонч ҳосил қилишимиз керак. Ҳозир сизда OTP банк бор, бу биринчиси. Ўйлайманки, бу битимни якунлаш орқали Ўзбекистон очиқ, Ўзбекистон тайёр ва банклар инвесторларни кутяпти деган сигнал берилади. Бу секин жараён, лекин у тўғри йўналишда силжияпти”, — деди Энрико Пинали.
Изоҳ (0)