Ташқи меҳнат миграцияси Россияга ишлаш учун кетаётган ўзбекистонликлар сони ошганини рад этди

Бандлик ва меҳнат муносабатлари вазирлиги ҳузуридаги Ташқи меҳнат миграцияси агентлиги Россияда ўзбекистонлик меҳнат муҳожирлари сони ошгани ҳақидаги хабарга муносабат билдирди.

Россия иқтисодий ривожланиш вазири Максим Решетников етти йил ичида Ўзбекистондан Россияга ишлаш учун келаётган фуқаролар сони тўрт баравар кўпайганини айтганди.

Ташқи меҳнат миграцияси агентлиги ахборотида таъкидланишича, меҳнат миграцияси, айниқса Россия Федерациясига ишлаш мақсадида борувчилар оқими иш мавсумига кўра тез ўзгарувчан ҳисобланади.

“Ўзбекистонлик меҳнат мигрантларининг асосий қисми Россия Федерацияси ҳиссасига тўғри келса-да, аммо хабарларда таъкидланаётгандек сўнгги 7 йилда ушбу давлатга кетаётган юртдошларимиз сони 4 баробар ошмаган. Агар рақамларга мурожаат қилинса, Россия Федерациясида вақтинча меҳнат фаолиятини олиб бораётган ўзбекистонлик мигрантлар сони 2016 йилда тахминан 2 миллион нафар бўлган бўлса, ҳозирги вақтда бу 1,5 миллион нафарга яқинни ташкил этади”, — дейилади хабарда.

Агентлик сўнгги йилларда меҳнат миграцияси географиясини кенгайтириш, хусусан, хорижда ишлаш истагидаги фуқароларни дунёнинг ривожланган давлатларига манзилли ишларга жалб қилиш бўйича қатор натижаларга эришилганини ҳам қайд этиб ўтган. Жумладан, Жанубий Корея, Япония, Туркия, Германия, Буюк Британия ва Европанинг бошқа мамлакатларида қурилиш, ишлаб чиқариш, тиббиёт ва хизмат кўрсатиш соҳаларининг турли йўналишларида ишчиларга талаб юқори.

Ташқи меҳнат миграцияси агентлиги 33 та давлатнинг 500 га яқин иш берувчи ташкилотлари билан келишувлар имзолаган.