Тошкент вилояти ИИББ Тезкор қидирув хизмати ходимлари томонидан вилоят ҳудудида иккита транспорт воситасини олиб қочган шахс қўлга олинди. Бу ҳақда идора матбуот хизмати хабар берди.
Қайд этилишича, 10 май куни соат 20:20 ларда Тошкент вилояти ИИББ 102 хизматига “ВАЗ-21013” русумли автоуловини эшикларини ёпмасдан, калитини ҳам ўзида қолдирган фуқаро қайтиб чиққанида, автомобили жойида йўқлигини маълум қилган.
Худди шундай ҳолат 12 май куни Қуйи Чирчиқ туманида ҳам содир бўлган. “Сергели” маҳалласи ҳудудида жойлашган дала майдонида фуқаро ўзига тегишли бўлган Nexia автомашинасини номаълум томонга олиб қочиб кетилганини маълум қилган. Бу икки ҳолат ўртасида ўзаро боғлиқлик мавжудлиги бўйича дастлабки хулосалар олиниб, тезкор қидирув тадбирлари жадаллаштирилган.
Қуйи Чирчиқ туман Ички ишлар бўлими тезкор ходимлари томонидан ўтказилган тадбирлар давомида Nexia автомашинасини Тошкент шаҳрида туғилган, Паркент туманида рўйхатга олинган, фуқаролиги бўлмаган 32 ёшли шахс олиб қочгани аниқланиб, у далилий ашёлар билан ушланган.
Олиб борилган суриштирув ишлари давомида, ушбу шахс жорий йилнинг 10 май куни Нурафшон шаҳрида “ВАЗ-21013” русумли автомашинани ҳам олиб қочиб кетгани маълум бўлган.
Ҳозирда гумонланувчининг бошқа жиноятларга алоқадорлигини текшириш мақсадида қўшимча суриштирув ишлари олиб борилмоқда.
Май бошларида Қорақалпоғистоннинг Нукус шаҳрида олиб қочилган Trailblazer ағдарилган ҳолда топилганди. Апрель ўрталарида эса Тошкент вилояти Юқори Чирчиқ туманида ўзганинг машинасини олиб қочган 18 ёшли йигит ушлангани тўғрисида хабар берилганди.
Изоҳ (0)