Сурхондарё вилояти Сариосиё тумани Сангардак қишлоғида 110 миллиард сўмга санаторий қурилмоқда. Бу ҳақда вилоят матбуот хизмати хабар берди.
Маълум қилинишича, 20 май куни Сурхондарё вилоят ҳокими Улуғбек Қосимов Касаба уюшмалари федерацияси томонидан қурилаётган, умумий қиймати 110 миллиард сўм бўлган, 7 қаватли, 200 ўринли “Сангардак” санаторийсида олиб борилаётган қурилиш-таъмирлаш ишлари билан танишган.
“Ўзига хос табиати, шаршараси ва мусаффо ҳавоси сабаб маҳаллий ва хорижлик сайёҳларнинг севимли масканларидан бирига айланган Сангардак қишлоғида бу каби санаторийларнинг барпо этилиши экотуризм ривожига хизмат қилади”, — дейилади хабарда.
Вилоят раҳбари қурилиш-таъмирлаш ишларини сифатли олиб бориш ва лойиҳани ўз муддатида фойдаланишга топшириш, шунингдек, мутасаддиларга сиҳатгоҳ қурилишида юзага келаётган муаммолар, хусусан, сув ва электр энергияси таъминоти масаласини ўрганиб, ҳал этиш вазифасини юклаган.
Март ўрталарида Ўзбекистон касаба уюшмалари федерацияси томонидан Қорақалпоғистоннинг Бўзатов туманида “Бўзатов” санаторийси қурилиши бошланганди. Мазкур лойиҳага касаба уюшмалари федерацияси томонидан 123 миллиард сўм йўналтирилиб, лойиҳа учун 7,2 гектар ер майдони ажратилган, Лойиҳа натижасида 120 иш ўрни яратилиши белгиланган.
Изоҳ (0)