Тошкент шаҳар Яшнобод туманида номаълум шахслар блогер Миразиз Бозоровни ўғирлаб кетди. Бу ҳақда унинг онаси ва гувоҳларга таяниб, Telegramъдаги “Сарпа” канали хабар берди.
Қайд этилишича, 19 май куни соат 17:00 ларда блогерни уйи яқинида давлат рақамисиз турган кулранг Matizъга мажбурлаб ўтқизишган.
“У машинадан чиқиб, ёрдам беринглар, деган ҳолда қоча бошлади, аммо машинадан тушган бир неча эркак унга етиб олди ва куч билан ортга олиб кетди. Атрофда камида 10 нафар гувоҳ, жумладан, болалар бор эди… Воқеа жойида блогернинг кўзойнак ва оёқ кийими қолиб кетди”, — дейилади хабарда.
Ички ишлар вазирлиги матбуот котиби Шоҳрух Ғиёсов ҳолатга муносабатини билдирди. “Уйида ўтирибди”, — деб ёзади ИИВ масъули.
Миразиз Бозоров 2021 йилнинг январида Жиноят кодексининг 139-моддаси (туҳмат) 3-қисми “г” бандида назарда тутилган жиноятни содир этганликда айбли деб топилганди. Унга 3 йил муддатга озодликни чеклаш жазоси тайинланган.
Ўзбекистонда бир жинсли муносабатларнинг қонунийлаштирилишига қарши бўлган фаоллар 2021 йил 28 март куни ўз норозиликларини билдириш мақсадида Тошкент марказидаги Амир Темур хиёбони олдида тўпланганди. Кейинроқ Тошкент шаҳар ИИББ матбуот хизмати LGБТ фаолларига қарши норозилик ҳолатидан сўнг 12 киши ушланганини маълум қилди.
Миразиз Бозоровнинг ўзи Telegram каналида учта блогер номини таъкидлаб ўтган. Улар – Аброр Абдуазимов (Аброр Мухтор Алий), Шуҳрат Мусаев ва Абусолиҳ Салимов (АбуСолиҳ Fox). Бозоровнинг таъкидлашича, ушбу уч блогер ўз обуначиларини унга қарши “қўзғаган”.
У, шунингдек, айтилган блогерлардан бири унинг манзилини “ўлдиришга чақириқ билан” эълон қилганини даъво қилган эди. Унинг сўзларига кўра, таҳдидлар тўғрисида ҳуқуқни муҳофаза қилиш идораларига қилган мурожаатларига эътибор берилмаган.
Депутат Алишер Қодиров LGБТ тарғиботига қарши “юмшоқ жазо”ни кучайтиришга, Расул Кушербаев эса провокаторларга чора кўришга чақирганди. Кейинроқ LGБТ ҳуқуқларини ҳимоя қилган блогер Миразиз Бозоров ўз уйи олдида дўппослаб кетилгани маълум қилинди.
Ушбу можаролар ҳақида 30 март куни ўша вақтда Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси бўлган Комил Алламжонов ҳам муносабат билдириб, халқаро ташкилотларни Ўзбекистон ёки бошқа ҳар қандай давлатга бирор талаб қўйишдан олдин миллатнинг менталитети, дини, маданияти, урф-одатларини инобатга олишга чақирганди. АОКА эса LGБТ можаролари ҳамда шу билан боғлиқ воқеалар юзасидан блогер ва ижтимоий тармоқ фаолларига мурожаат қилган эди.
Бундан ташқари, БМТ Тошкентда содир бўлган “хавотирли воқеалар”ни холис тергов қилишга чақирган. Кейинроқ Миразиз Бозоровга нисбатан айблов эълон қилинган эди.
Изоҳ (0)