Андижон вилояти Қўрғонтепа тумани ҳокимининг қишлоқ хўжалиги масалалари бўйича ўринбосари Баҳромжон Турсунов ушбу лавозимга ноқонуний тайинланган бўлиши мумкин. Туман ҳокими суддан унга енгиллик беришини сўраб илтимоснома киритган. Бу ҳақда “Дарё” мухбири суриштирув олиб борди.
Санани эслаб қолинг!
Баҳромжон Турсунов 1983 йилда Қўрғонтепа туманида туғилган. У ширкат хўжалиги ишчилигидан деҳқон бозори директори, туман ҳокимининг ўринбосарлигигача бўлган йўлни босиб ўтган. 2004 йилда Андижон қишлоқ хўжалик институтини тамомлаган, мутахассислиги — ипакчилик. Ҳоким ўринбосарлигига тайинлангунига қадар у Trade Imperia Evolution масъулияти чекланган жамият раҳбари бўлган.
Б.Турсунов 2023 йил 5 апрелдан буён (ушбу санани эслаб қолинг) Қўрғонтепа тумани ҳокимининг қишлоқ хўжалиги масалалари бўйича ўринбосари сифатида ишлаб келмоқда.
Суд ҳукми
Жиноят ишлари бўйича Избоскан туман судида 2022 йилнинг 17 май куни Қўрғонтепа тумани ҳокимининг собиқ ўринбосари Баҳромжон Турсунов ва бошқаларга нисбатан жиноят иши кўриб чиқилган. Маҳкама ишида Баҳромжон Турсунов Жиноят кодексининг 205-моддаси (ҳокимият ёки мансаб ваколатини суиистеъмол қилиш) 2-қисмининг “а” (жуда кўп миқдорда зарар етказган ҳолда) банди ва 209-моддаси (мансаб сохтакорлиги) 2-қисмининг “а” (такроран ёки хавфли рецидивист томонидан) банди билан айбланган.
Суд иш ҳужжатларини кўриб чиқиб, Баҳромжон Турсунов Жиноят кодексининг 209-моддаси (мансаб сохтакорлиги) 1-қисми (мансаб сохтакорлиги, яъни давлат органи, давлат иштирокидаги ташкилот ёки фуқароларнинг ўзини ўзи бошқариш органи мансабдор шахсининг ғаразгўйлик ёки бошқа манфаатларни кўзлаб, расмий ҳужжатларга била туриб сохта маълумотлар ва ёзувлар киритиши, ҳужжатларни қалбакилаштириши ёки била туриб сохта ҳужжатлар тузиши ва тақдим этиши фуқароларнинг ҳуқуқларига ёки қонун билан қўриқланадиган манфаатларига ёхуд давлат ёки жамоат манфаатларига жиддий зарар етказилишига сабаб бўлса) билан айбли деб топган. Унга нисбатан 1 йил маҳаллий ҳокимият органларида мансабдорлик лавозимларида ишлаш ҳуқуқидан маҳрум қилиш жазоси тайинланган.
У суд томонидан тайинланган жазони суд ҳукми нусхаси ИИБ Пробация гуруҳига келиб тушган санадан, яъни 2022 йилнинг 2 июль кунидан бошлаб ўтай бошлаган.
Тайинлов нега ноқонуний?
Гап шундаки, туман ҳокимининг Бахромжон Турсуновни Қўрғонтепа тумани ҳокимининг қишлоқ ва сув хўжалиги масалалари бўйича ўринбосари лавозимига тайинлаш тўғрисидаги қарори 5 апрель куни чиққан. Яъни ушбу санада муайян ҳуқуқдан маҳрум қилиш тўғрисидаги суд ҳукми ўз кучида эди, аниқроғи, Турсуновга берилган жазо муддат тугашига 3 ойдан кўп вақт бўлишига қарамай, мансабдорлик вазифасига тайинланган.
Ушбу қарор Халқ депутатлари туман кенгашининг навбатдаги сессияси тасдиғига киритилиши лозим эди. Бироқ кенгаш котибият мудири Шукрулло Қўлдошевнинг “Дарё”га айтишича, қарор кенгаш кун тартибига киритилмаган.
“Бизга бу қарор тушган эмас, биз тасдиқламаганмиз. Ўрни бўшлиги, тажрибаси борлиги учун вилоят ҳокими олиб келиб қўйди, “Шу ишлаб турсин”, деди. Биз 5 апрелдан кейин икки марта сессия ўтказдик, лекин қарор бизга туширилгани йўқ. Қоида бўйича қарор чиққанидан кейин 10 кун ичида кенгашга киритилиши керак”, — деди котибият мудири.
Ҳоким ўз хатосини тўғриламоқчи бўлди
“Дарё” нашри суриштирув бошлагандан кейин Қўрғонтепа туман ҳокими ўз хатосини тўғрилашга киришган. Туман ҳокими Элёрбек Набижановнинг шахсан ўзи судга Баҳромжон Турсуновга нисбатан тайинланган муайян ҳуқуқдан маҳрум қилиш жазосини ўташдан муддатидан илгари шартли озод қилиш тўғрисидаги илтимоснома киритган.
Илтимосномада ҳоким Баҳромжон Турсунов жазони ўташ даврида ўзига тўғри хулоса чиқариб олгани, интизомий жазога тортилмагани, уни моддий жавобгарлик билан боғлиқ вазифаларга тайинлаш учун юқоридаги жазодан муддатидан олдин шартли озод қилиниши кераклигини қатъий таъкидлаган.
Жиноят ишлари бўйича Қўрғонтепа туман суди 27 апрель куни ҳокимнинг илтимосномасини қаноатлантирган. Унга кўра, маҳкум Баҳромжон Турсунов суд томонидан тайинланган муайян ҳуқуқдан, яъни мансабдорлик ва моддий жавобгарлик билан боғлиқ лавозимларда ишлаш ҳуқуқидан маҳрум қилиш жазосининг қолган 2 (икки) ой 18 кун қисмини ўташдан Жиноят кодексининг 73-моддаси 3-қисми “а” бандига асосан муддатидан илгари шартли озод қилинган.
Кўринадики, ҳокимлик 3 ойдан ортиқ (жазо 2022 йилнинг 2 июль кунидан бошлаб ўтай бошланган) ўталмай қолган жазо муддати бўла туриб, суд ҳукмига зид равишда Баҳромжон Турсуновни лавозимга тайинлаган.
“Дарё” воқеалар ривожини кузатиб боради.
Изоҳ (0)