Бирлашган Миллатлар Ташкилоти маълумотларига кўра, инсонпарварлик ёрдами ва Судан халқини қўллаб-қувватлаш учун 3 миллиард доллардан ортиқ маблағ керак, деб ёзади Euronews.
БМТ режаси бир ойдан ортиқ вақтдан бери ҳарбий тўқнашувлар давом этаётган мамлакатдаги 18 миллион кишига ёрдам беришга қаратилган.
“Судандаги инқироз шиддат билан минтақавий инқирозга айланиб бормоқда. Суданликлар энг асосий нарсалар: ҳимоя, тиббий ёрдам, озиқ-овқат ва сув, санитария, уй-жойга муҳтож. Тобора кучайиб бораётган бу тартибсизликда айниқса, болаларнинг аҳволи оғир”, — деди БМТнинг гуманитар бўлими раҳбари Рамеш Ражасингхам.
15 апрель куни Судан пойтахти Хартум ва мамлакатнинг бошқа шаҳарларида армия ва ҳарбийлаштирилган гуруҳ – “Тезкор ҳаракат кучлари” ўртасида қуролли тўқнашувлар бошланди. Юзлаб одамлар ҳалок бўлди, бир неча минг фуқаро Суданни тарк этди.
Можаро нима сабабдан бошланди?
Қуролли можаро мамлакатнинг амалдаги президенти, мунтазам армияни назорат қилувчи генерал Абдул Фаттоҳ ал-Бурхон ва унинг ўринбосари, “Тезкор ҳаракат кучлари” қўмондони генерал Муҳаммад Ҳамдан Дагало ўртасидаги муносабатларнинг кескинлашиши натижасида юзага келган.
Улар 2021 йил октябрда давлат тўнтариши натижасида ҳокимиятга келганди, аммо аста-секин давлатни бошқариш бўйича келишмовчилик келиб чиқиб, фуқаролик бошқарувига ўтиш таклиф қилинди.
Қарама-қаршиликнинг кескин босқичи Дагало 100 мингга яқин одамни ташкил этувчи “Тезкор ҳаракат кучларини” бутун мамлакат бўйлаб жойлаштирганидан кейин бошланди, ал-Бурхон буни таҳдид сифатида қабул қилди.
Ҳар икки томон Хартумдаги муҳим объектлар устидан назоратни қўлга олганини даъво қилмоқда, аммо ким нимани назорат қилаётгани тўлиқ маълум эмас. Асосий жанглар шаҳар марказида жойлашган Хартум аэропорти ҳудудида кечаётгани хабар қилинган.
Изоҳ (0)