Гидрометеорология хизмати марказининг бош директори Шерзод Ҳабибуллаев ўзини ўзи 46 миллион сўм билан рағбатлантиргани ҳақидаги буйруқ нусхаси ижтимоий тармоқларда кенг муҳокамаларга сабаб бўлмоқда.
Ходимларни рағбатлантириш тўғрисидаги буйруқ Гидрометеорология хизмати марказининг бош директори Шерзод Ҳабибуллаев томонидан чиқарилган. Унга кўра, “Ўзгидромет”да ижро интизоми бўйича масъул бўлган ходимларни рағбатлантириш кўзда тутилган. Аниқроғи, 2022 йилда келиб тушган мурожаатлар, ҳужжатлар, топшириқлар, буйруқ ва фармойишлар ижросини ўз вақтида сифатли бажаришда фаол иштирок этган ходимлар рағбатлантирилган.
Юқорида зикр этилган вазифаларни бажаришда фаол иштирокчи сифатида бош директор Шерзод Ҳабибуллаев ўзини ва ўринбосари Ибратжон Каримовни қайд этган. У ўзи ва ўринбосарини меҳнатга ҳақ тўлашнинг энг кам миқдорининг (920 минг сўм) 50 баробарида, яъни 46 миллион сўм билан рағбатлантирган.
Марказнинг мурожаатлар билан ишлаш ва ижро интизоми бўлими бошлиғи Дилмурод Қориевга эса меҳнатга ҳақ тўлашнинг энг кам миқдори (МҲТЭКМ) 5 баробари — 4 миллион 6 минг сўм миқдорида рағбатлантириш ёзилган. Ушбу бўлимнинг 1 тоифали мутахассиси К.Баҳромовга эса МҲТЭКМ 2 баробари — 1 миллион 840 минг сўм берилган.
Яна бир қизиқ жиҳати, мазкур буйруққа бош директор ўринбосари Фируз Сафаровнинг билдиришномаси асос қилиб олинган. Кўринадики, Фируз Сафаров бош директорни рағбатлантиришни сўраб бош директорга билдиришнома киритган ва у Шерзод Ҳабибуллаев томонидан мақулланган.
Ҳолат ўрганилмоқда
Табиат ресурслари вазирлигининг маълум қилишича, ҳозирда ҳолат юзасидан хизмат текшируви тайинланган ва тегишли тартибда ўрганиш ишлари олиб борилмоқда.
“Текширув натижаси бўйича Табиат ресурслари вазирлиги томонидан қонунга мувофиқ равишда тегишли чоралар кўрилиши маълум қилинади”, дейилади вазирлик ахборотида.
Гидрометеорология хизмати маркази матбуот котиби Мунисахон Асилхожаеванинг “Дарё”га маълум қилишича, мазкур ҳолат ҳақиқатан ҳам вазирлик томонидан тузилган ишчи гуруҳ томонидан ўрганилмоқда.
Изоҳ (0)