Қашқадарё вилоятининг Қарши шаҳрида Ички ишлар мансабдори фуқаро манфаати учун прокурорга қарши чиқиб, унинг ноқонуний талабини бажаришдан бош тортгани ҳақида хабар берилганди. Бош прокуратура ҳолатга муносабат билдириб, Ички ишлар мансабдорини сохта обрў орттиришга ҳаракат қилишда айблади.
“А.Жўраев ўзига юклатилган вазифаларни бажаришдан бўйин товлаб, фуқарога ноқонуний қурилмани ихтиёрий бартараф этиш ҳақидаги далолатномани топшириш чораларини кўрмаган. Сохта обрў орттириш мақсадида шаҳар прокурорининг ўз хизмат вазифаларини лозим даражада бажариши ҳақидаги талабига нисбатан гўёки прокурор фуқаро манфаатларига зид ҳаракат қилаётгани ҳақида асоссиз важлар келтириш орқали эътироз билдирган”, — дейилади Бош прокуратуранинг бу ҳақдаги расмий ахборотида.
Қарши шаҳар ИИБ, 4-сонли Ички ишлар бўлими бошлиғи Асрор Жўраев прокурорнинг телефон орқали бераётган топшириғидан норозилигини билдирар экан “Улуғ айём кунларида ўтирибсиз, одамларни бундай қақшатманг. Ёқиб юборди эмас, устидан қуйди. Худодан қўрқинг, туҳмат қилманг, бола-чақа ўстиряпсиз. Хоҳлаган каттамга чиқинг, мен пенсияга чиқсам чиқаманки, бундай қилмайман. Мен халқимни яхши кўраман, халқимни севаман”, — деганди.
Бош прокуратура, шунингдек, мазкур ҳолатни келтириб чиқарган вазиятга ҳам аниқлик киритган.
“Фуқаро Б.Ходиев тегишли ҳужжатларсиз, ўзбошимчалик билан Қашқадарё вилояти кўп тармоқли тиббиёт марказига кириш дарвозаси ёнида савдо дўконини қуриб олган бўлиб, савдо дўкони тез тиббий ёрдам машиналарининг шифохона ҳудудига кириб-чиқишига тўсқинлик қилгани ва фуқароларнинг эътирозларига сабаб бўлаётгани учун қурилмани ихтиёрий бузиб олиш тўғрисида бир неча марта огоҳлантирилган. Маъмурий жавобгарликка тортилган. Шунга қарамасдан, ноқонуний қурилишни бартараф этиш чораларини кўрмаган.
Мазкур ҳолат Қарши шаҳар прокурори томонидан назоратга олинган бўлиб, шу йил 13 апрель куни Қарши шаҳар ИИО ФМБ ҳузуридаги 4-сонли ИИБ бошлиғи А.Жўраев мутасадди идоралар билан биргаликда Б.Ходиевга ноқонуний қурилмани ихтиёрий бартараф этиш бўйича кўрсатма бериш учун борган. Шу вақтда Б.Ходиевнинг турмуш ўртоғи масъул ходимларга фаол қаршилик кўрсатиб, уларни хизмат вазифаларини бажаришдан воз кечишга мажбурлаш мақсадида савдо дўконини бузмаслигини билдириб, кийимларига бензин сепиб, ўзини ўзи ёқиш билан қўрқитган”, — дейилади расмийлар маълумотида.
Қўшимча қилинишича, Бобур Ходиев томонидан ўзбошимчалик билан қурилган ноқонуний бино ихтиёрий бартараф этилмагани сабабли Кадастр агентлиги Қарши шаҳар бўлими томонидан судга киритилган даъво аризаси фуқаролик ишлари бўйича Қарши туманлараро судининг 2023 йил 5 майдаги ҳал қилув қарори билан қаноатлантирилиб, жавобгарга ноқонуний қурилмани мажбурий тартибда буздириш ва ер майдонини фойдаланишга яроқли ҳолатга келтириш мажбурияти юклатилган.
Изоҳ (0)