Наманган йўл қуриш-таъмирлаш корхонаси 19—24 апрель оралиғида бошланғич қиймати 1 миллиард 920 миллион 800 минг сўм бўлган тендер ўтказган. “Дарё” мухбири лот маълумотларини мониторинг қилиш давомида тендерни ютган корхона амалда фаолият кўрсатмаётганини аниқлади.
Давлат хариди 2023 йил давомида йўл қуриш ишларида ишлатиш учун асфалтобетон маҳсулотлари сотиб олиш мақсадида ўтказилган. Ғолиб корхона тендер якунланганидан сўнг 20 кун ичида маҳсулотларни етказиб бериши керак.
Савдоларда учта тадбиркорлик субъекти иштирок этган. Комиссия аъзоларининг якуний натижаларига кўра, тендерни 100 балл билан “Рахимберди Логистика” МЧЖ ютиб олган. Шартнома суммаси 1 миллиард 881 миллион 600 минг сўм.
Ғолиб корхонанинг раҳбарияти ҳақидаги маълумотлар билан танишиш жараёнида шубҳали ҳолатга дуч келдик. Статистика агентлигига кўра, “Рахимберди Логистика” корхонаси 2019 йилда ташкил этилган бўлиб, ҳозирда расман фаолият кўрсатмайди.
“Дарё” мухбири ҳолат юзасидан изоҳ олиш мақсадида Наманган йўл қуриш-таъмирлаш корхонаси ва “Рахимберди Логистика” МЧЖнинг алоқа телефон рақамларига қўнғироқ қилди, аммо боғланишнинг имкони бўлмади.
Масъуллардан ушбу шубҳали тендер натижаларига эътибор қаратишни сўраймиз.
Изоҳ (0)