Тошкент шаҳрида 18 май куни камбағалликни қисқартириш бўйича II халқаро форум бўлиб ўтади. Тадбирда иқтисод бўйича Нобел мукофоти соҳиби Абхижит Банержи ҳам қатнашади. Бу ҳақда Иқтисодий тадқиқотлар ва ислоҳотлар маркази “Дарё”га маълум қилди.
Форум Ўзбекистон камбағалликни қисқартириш ва бандлик вазирлиги ҳамда Иқтисодий тадқиқотлар ва Ислоҳотлар маркази ҳамкорлигида ташкил этилмоқда. Тадбирда 200 дан ортиқ делегатлар, нуфузли халқаро ташкилотлар экспертлари иштирок этиши кутилмоқда. Хусусан, форумга иқтисод бўйича Алфред Нобел номидаги мукофот совриндори, камбағалликни қисқартириш бўйича глобал ташаббуси J-PAL ҳаммуассиси Абхижит Банержи ташриф буюради. Шу билан бирга, Жорж Вашингтон университетининг фаровонлик иқтисодиёти ва камбағалликни ўлчаш бўйича иқтисод профессори Жеймс Фостер, Оксфорд камбағалликка қарши курашиш ва инсон капиталини ривожлантириш ташаббуси директори Сабина Алкайр сингари олимлар келиши кутилмоқда.
Марказ хабарига кўра, форумдан мақсад — камбағалликка қарши курашиш бўйича жаҳон тажрибасини ўрганиш, ижтимоий ҳимоя ва манзилли ёрдамга оид тадқиқотлар учун устувор йўналишларни шакллантириш, инсон капиталини такомиллаштириш масалаларини муҳокама қилиш. Шунингдек, иштирокчилар Ўзбекистонда камбағалликка қарши курашиш бўйича эришилган натижалар ва олдиндаги режаларни таҳлил қилади, ўзаро фикр алмашади.
Форум доирасида ҳамкорликка оид бир қатор ҳужжатларни имзолаш ва қўшма коммюникени қабул қилиш режалаштирилган. Жумладан, Иқтисодий тадқиқотлар ва ислоҳотлар маркази ҳамда J-PAL глобал ташаббуси ўртасида ҳамкорлик дастури имзоланиши кутилмоқда.
Изоҳ (0)