Самарқанд вилоятининг Паст Дарғом туманида Камбағалликни қисқартириш ва бандлик бўлими бошлиғи лавозимида ишлаган мансабдор маҳалла раисларига босим ўтказиб, уларни овоз йиғишга мажбур қилгани ортидан вазифасидан олинганди. “Дарё” мазкур вазият юзасидан Паст Дарғом туман ҳокими Ваҳобжон Муродқобилов билан боғланиб, туманда келгусида бундай ҳолатлар юз бермаслиги учун вазиятга раҳбарлар томонидан қандай фикр билдирилгани билан қизиқди.
“Ҳолат тармоқларда кенг муҳокама қилинди. Шу сабаб вазият вилоят ҳокими бошчилигидаги йиғилишда кўриб чиқилди. Трибунада Тоҳир Қосимовдан қилмишига изоҳ сўралди. У айбини тан олиб, қилган қилмишини инкор этмади”, — дейди Паст Дарғом тумани ҳокими Ваҳобжон Муродқобилов.
Туман ҳокими собиқ мансабдор қилмишини тан олган бўлишига қарамасдан унга нисбатан хизмат текшируви ҳам тайинланганини қўшимча қилди.
“Айбини тўлиқ тан олди, шунга қарамасдан унга нисбатан хизмат текшируви ҳам тайинланган. Хизмат текшируви натижаси бўйича яна қўшимча хулосалар қилинади”, — дейди ҳоким.
Ваҳобжон Муродқобилов шунингдек, Паст Дарғом туманида кўплаб янгиликлар қилинаётгани, буларнинг барчаси туман аҳлининг фаровон ҳаётини таъминлаш мақсадида амалга оширилаётганини айтиб, “Биргина раҳбарнинг ёмон қилмиши қисқа фурсатда кўп жойга тарқалди ва шов-шувларга сабаб бўлди, лекин биз қилаётган яхши ишлар, жумладан туманимиз тадбиркорларининг хайрли амаллари сабаб туман аҳолисининг ҳаёти яхшиланаётгани, янгиликлар бўлаётгани Оммавий ахборот воситалари вакиллари эътиборидан четда қолмоқда. Шу сабаб мен айни фурсатда журналист ва блогерларга мурожаат қилиб, яхши янгиликларимизни ҳам мана шундай шов-шувли тарзда ёритиб беришларини сўраган бўлардим”, — деди.
Изоҳ (0)