Samarqand viloyatining Past Darg‘om tumanida Kambag‘allikni qisqartirish va bandlik bo‘limi boshlig‘i lavozimida ishlagan mansabdor mahalla raislariga bosim o‘tkazib, ularni ovoz yig‘ishga majbur qilgani ortidan vazifasidan olingandi. “Daryo” mazkur vaziyat yuzasidan Past Darg‘om tuman hokimi Vahobjon Murodqobilov bilan bog‘lanib, tumanda kelgusida bunday holatlar yuz bermasligi uchun vaziyatga rahbarlar tomonidan qanday fikr bildirilgani bilan qiziqdi.
“Holat tarmoqlarda keng muhokama qilindi. Shu sabab vaziyat viloyat hokimi boshchiligidagi yig‘ilishda ko‘rib chiqildi. Tribunada Tohir Qosimovdan qilmishiga izoh so‘raldi. U aybini tan olib, qilgan qilmishini inkor etmadi”, — deydi Past Darg‘om tumani hokimi Vahobjon Murodqobilov.
Tuman hokimi sobiq mansabdor qilmishini tan olgan bo‘lishiga qaramasdan unga nisbatan xizmat tekshiruvi ham tayinlanganini qo‘shimcha qildi.
“Aybini to‘liq tan oldi, shunga qaramasdan unga nisbatan xizmat tekshiruvi ham tayinlangan. Xizmat tekshiruvi natijasi bo‘yicha yana qo‘shimcha xulosalar qilinadi”, — deydi hokim.
Vahobjon Murodqobilov shuningdek, Past Darg‘om tumanida ko‘plab yangiliklar qilinayotgani, bularning barchasi tuman ahlining farovon hayotini taʼminlash maqsadida amalga oshirilayotganini aytib, “Birgina rahbarning yomon qilmishi qisqa fursatda ko‘p joyga tarqaldi va shov-shuvlarga sabab bo‘ldi, lekin biz qilayotgan yaxshi ishlar, jumladan tumanimiz tadbirkorlarining xayrli amallari sabab tuman aholisining hayoti yaxshilanayotgani, yangiliklar bo‘layotgani Ommaviy axborot vositalari vakillari eʼtiboridan chetda qolmoqda. Shu sabab men ayni fursatda jurnalist va blogerlarga murojaat qilib, yaxshi yangiliklarimizni ham mana shunday shov-shuvli tarzda yoritib berishlarini so‘ragan bo‘lardim”, — dedi.
Izoh (0)