Самарқанд вилояти Каттақўрғон туманидаги хусусий боғчада тўрт ёшли бола калтаклангани айтилмоқда.
Маълум қилинишича, бола туманнинг Валижон қишлоғида яшайди. Воқеа 20 апрель куни боғча ҳудудида содир бўлган. Унинг онаси воқеани суриштирганида турли тарбиячилардан турлича маълумот олган. Шу сабабли ҳам уни ўз тарбиячиси урган, деган қарорга келган.
“Соат 8 да боғчага олиб борган эдим. Ҳеч қаерида жароҳат йўқ эди. Соат 16:20 да боламни олгани бордим. Борсам бурни шишган экан. Нима бўлганини сўрасам, боғча опаси цирк келганини айтиб, цирк олдида стулда йиқилиб тушди, деди. У менга шунақа маълумот берди. Турли боғча опалар турлича маълумот берди. Шу сабабли боғча опаси урди, деган қарорга келдим”, — дейди боланинг онаси.
Бола 20 апрель куни кечки соат 18:00 лар атрофида туман тиббиёт бирлашмасининг жарроҳлик бўлимига олиб келинган ва шу ерда 7 кун давомида даволанган. У бош мия чайқалиши диагнози билан бўлимга ётқизилган.
Боғча мудирасининг сўзларига кўра, воқеа содир бўлган куни уни бошқа бир бола йиқитиб юборган бўлган. Бироқ онаси олиб кетаётган вақтда унда ҳеч қандай безовталаниш ҳолатлари кузатилмаган.
“Ёнидаги шериги билан талашиб қолган, ўзи жудаям шўх бола. Кейин Машҳурбекни итариб юборган, йиқилган ва бурни қонаган. Тарбиячиси тез ёрдам кўрсатиб, бурни қонаганини тўхтатган. Соат 5 ларда онаси келган, лекин бола безовта бўлмади, йиғламади ҳам ҳаттоки”, — дейди мудира.
Шунингдек, боланинг тарбиячиси ҳолат унинг эътиборсизлиги сабаб юзага келганини, қаттиқ пушаймон эканлигини айтиб, ишдан ўз аризасига биноан бўшаганини маълум қилди.
Вилоят Мактабгача ва мактаб таълими бўлими ахборот хизматининг маълум қилишича, ҳолат Каттақўрғон тумани мактабгача ва мактаб таълими бўлимининг тегишли масъуллари томонидан ўрганиб чиқилди.
Айтилишича, 20 апрель куни соат 10:30 ларда Каттақўрғон тумани Валижон қишлоғида жойлашган ЯТТ “Салимова Мамлакат” ОНМТТ тарбиячиси ўйин майдончасига тарбияланувчиларни олиб чиққан. Тарбияланувчи М.М. ўртоғи У.А. билан арғимчоқ учиш учун талашиб, арғимчоқнинг метал устунига бурни билан йиқилган, натижада бурни қонаган.
Тарбиячи тезда М.М.га биринчи тиббий тез ёрдам кўрсатган. Муолажа натижасида М.М.нинг бурни қонаши тўхтаган. Ўша куни тарбияланувчи М.М.да безовталик ҳолати бўлмагани сабабли тиббиёт бирлашмасига олиб борилмаган.
М.М.нинг онаси боланинг бурун қисмидаги тан жароҳатини кўриб, тарбиячи томонидан калтаклангани тўғрисида шубҳа-гумонга борган. Айни пайтда ота-она ҳуқуқни муҳофаза қилиш органларига мурожаат қилган.
Ҳолат юзасидан туман ички ишлар бўлими томонидан ўрганиш ишлари олиб борилмоқда.
Изоҳ (0)