Украинага босқин муносабати билан Россияга қарши кенг кўламли санкциялар қўлланиши фонида Германиядан МДҲ мамлакатларига айрим тоифадаги товарлар экспорти икки баравар кўпайди. Бу ҳақда Bild нашри хабар берди.
Нашр Германия федерал статистика бошқармаси маълумотларига таяниб ёзишича, 2022 йилда немис товарларини етказиб бериш ундан олдинги йилга нисбатан Тожикистонга 150 фоизга, Беларусга 77 фоизга, Қирғизистонга 994 фоизга ошган.
Гап санкцияларни четлаб ўтиб, параллел импорт орқали Россияга товарлар етказиб бериш ҳақида кетмоқда. Қозоғистонга кимё маҳсулотлари экспортининг ўсиши 129 фоизни, Арманистонга 110 фоизни ташкил этди. Немис электр жиҳозларини Арманистонга етказиб бериш 344 фоизга, Ўзбекистонга 105 фоизга ошди. Шунингдек, Қозоғистонга металл буюмлар экспорти 137 фоизга, кийим-кечак эса 88 фоизга ошган.
Германия иқтисодиёти Шарқий қўмитасининг ҳисоб-китобларига кўра, 2022 йилда Германиядан Қозоғистонга автомобиль ва эҳтиёт қисмлар экспорти 507 фоизга, Арманистонга эса 761 фоизга ошган.
Билд нашрининг ёзишича, Европа Иттифоқининг санкциялар бўйича махсус вакили Девид O’Салливан ҳам аллақачон Германиядан МДҲ мамлакатларига товарлар етказиб бериш ҳажми ошишига эътибор қаратган.
Изоҳ (0)