Босфор бўғози остидан ўтувчи учинчи туннел қурилади ва у Туркиянинг энг йирик метропол шаҳрининг Европа ва Осиё қисмларини боғлайди. Бу ҳақда “Европейская правда” хабар берди.
Туркия президенти Ражаб Тоййиб Эрдўғон Истанбулдаги сайловолди митингида бу бўйича маълумот берди. У ушбу лойиҳанинг амалга оширилиши туфайли Истанбул транспорт тизимига ҳар куни 6,5 миллион фуқаро фойдаланадиган 11 хил темирйўл линиялари уланишини таъкидлади.
“Биз ҳозир Катта Истанбул туннели лойиҳасини амалга оширмоқдамиз. Бу лойиҳа Мармарай ва Евросиё туннелларидан кейин Босфор бўғози остидан ўтадиган учинчи туннел бўлади”, — деди Эрдўғон.
Катта Истанбул туннели уч қаватли бўлиши режалаштирилган бўлиб, бу уни дунёдаги биринчи шундай лойиҳа экани билан ажратиб туради.
Туркия ва Босфор остидаги туннеллар
2013 йил октябрь ойида Туркия Босфор бўғози остидан темирйўл туннелини очаётгани ҳақида хабар берилганди. Очилиш маросими Туркия республикаси ташкил топганининг 90 йиллигига бағишланган.
Мармарай лойиҳаси 2004 йилда бошланган ва дастлаб Туркия томонидан стратегик лойиҳа сифатида қаралган. У турк-япон консорсиуми томонидан қурилган. Япония томони лойиҳанинг ўзига хос хусусиятлари ва маршрутни ётқизиш шартларини ҳисобга олган ҳолда туннел қисмларини ишлаб чиққан. Магистрал йўлнинг умумий қиймати, жумладан, кириш йўллари, мавжуд йўллар ва унга инфратузилма объектларини боғловчи йўллар билан бирга, тахминан 5 миллиард долларни ташкил этган.
Туннел узунлиги 13,6 километр бўлиб, у ер остидан 56 метр чуқурликда ўтади.
2016 йилнинг декабрь ойида Истанбулда Босфор бўғози остидан ўтувчи автомобиль туннели очилганди. Икки қаватли “Евросиё” туннелининг узунлиги 14,6 километрни ташкил қилади. Босфор остида ётқизилган туннел қисмининг узунлиги 5,4 километрни, максимал чуқурлиги эса бўғоз юзаси остида 106 метрдан иборат.
Изоҳ (0)