Россия ҳарбий бўлимининг юқори раҳбарлари ўртасида ички зиддият давом этмоқда. Гап мудофаа вазири Сергей Шойгу ва “Вагнер” хусусий ҳарбий кампанияси эгаси Евгений Пригожин ўртасидаги рақобат ҳақида кетмоқда.
Россия Мудофаа вазирлиги “Вагнер” раҳбарини обрўсизлантириш режасини ишлаб чиқди. Бу ҳақда The Washington Post нашри хабар берди.
.jpg)
Журналистлар Пентагондан олинган ва интернетда чоп этилган махфий ҳужжатларга мурожаат қилади. Таъкидланишича, ҳарбий бўлим вакиллари Пригожинга ошкора қаршилик кўрсатишни истамаган, шунинг учун улар воситачилар орқали уни обрўсизлантириш кампаниясини ўтказишга қарор қилган.
“Расмийлар агар Мудофаа вазирлиги Пригожиннинг оммавий баёнотларига қарши чиқмоқчи бўлса, улар ‘Вагнер’ асосчиси билан курашиш учун тенг мақомга эга иттифоқчиларни топиши кераклигини айтган”, — дейилади хабарда.
Манбага кўра, Пригожин Путинни “Вагнер”га аъзо бўлиш учун маҳбусларни ёллашни давом эттиришга, янги сафарбар этилганларни тайёрлашга ва чет эллик ёлланма аскарларни, айниқса, Афғонистондан фаол излашга кўндирмоқчи бўлган.
Сиздирилган ҳужжатларда айтилишича, Путин Пригожинга бу масалаларни Мудофаа вазирлигининг ўзи ҳал қилишини айтган. Россия раҳбари шу тариқа генералларга ён босишга уринган.
Таъкидланишича, Кремль Пригожинга атайлаб расмийларни танқид қилишга рухсат берган, чунки бу Путиннинг сиёсий ҳудуд ва Украинадаги жанг майдонини алоҳида рақобатлашувчи гуруҳларга бўлиш стратегиясига тўғри келади. Шунда ҳеч бир томон кучли бўлиб қолмайди.
Филаделфиядаги Ташқи сиёсатни ўрганиш институти катта илмий ходими Роб Ли Пригожин Кремль учун ҳар доим ҳам муаммо бўлиб келмаганини таъкидлайди.
“Путин ҳокимиятни сақлаб қолиш учун рақиб гуруҳлардан фойдаланишни яхши кўради, аммо бу ҳарбий амалиётда жуда зарарли”, — деб тушунтирган таҳлилчи.
Изоҳ (0)