Еврокомиссияси илк бор Россияга ҳарбий мақсадларда ишлатилиши мумкин бўлган ускуналарни етказиб берган Хитойнинг 7 та компаниясини санкциялар рўйхатига киритди. Бу ҳақда Financial Times нашри хабар берди.
Маълумотларга кўра, рўйхат яқин кунларда Европа Иттифоқига аъзо давлатлар томонидан кўриб чиқилади. Мазкур фирмаларнинг айримлари АҚШнинг санкцияларига учраган, бироқ Евроиттифоқ ҳозирга қадар Хитой Москвага қурол етказиб бераётгани борасида тўғридан тўғри далиллар йўқлиги сабаб Пекинга қарши боришдан қочиб келаётганди.
“Украинага қарши тажовузкор урушни қўллаб-қувватлаш йўлида Россия ҳарбий-саноат мажмуаси томонидан фойдаланиш учун электрон компонентларнинг асосий ролини ҳисобга олган ҳолда, санкцияларни четлаб ўтишда иштирок этган учинчи мамлакатлардаги айрим субъектларни, шунингдек, мамлакат ҳарбий-саноат комплекси учун электрон компонентларни ишлаб чиқариш ва етказиб бериш билан шуғулланадиган якка тартибдаги Россия корхоналарини ҳам рўйхатга киритиш мақсадга мувофиқ”, — дейилади хабарда.
Санкциялар рўйхати амалда қўлланилиши учун Европа Иттифоқига аъзо 27 давлат томонидан маъқулланиши лозим. Бундан ташқари, Еврокомиссия дронлар ишлаб чиқариб, уларни Россияга етказиб бераётган айрим Эрон компанияларига ҳам санкциялар қўлламоқчи. Шу билан бирга, Брюссель нефтнинг ноқонуний экспортига йўл қўймасдан, ўз портини ҳеч қандай сабабсиз яширган нефть танкерларининг Европа Иттифоқи портларига киришини тақиқлашни таклиф қилмоқда.
Апрель охирларида АҚШ Қозоғистон Россияга ёрдам бериши туфайли иккинчи даражали санкцияларга дуч келиши мумкинлигидан огоҳлантирганди. Шунингдек, Ҳиндистон АҚШ санкцияларига тушмаган ҳолда Россиядан қурол олиш йўлини қидираётгани маълум бўлган эди.
Изоҳ (0)