Озарбайжон Ташқи ишлар вазирлиги Арманистон бош вазири Никол Пашинянни тарихдан сабоқ олмаганликда айблади. Тегишли баёнот вазирликнинг Telegram саҳифасида эълон қилинди.
Мазкур баёнотга Пашиняннинг Чехиядаги матбуот анжуманида Озарбайжонни этник тозалашда айблагани сабаб бўлган.
“Бош вазирнинг ъэтник тозалашъ ҳақидаги бемаъни гапларига келсак, тарих давомида озарбайжонларни оммавий қирғин қилиш, депортация қилиш сиёсатини тан олиш ва кечирим сўраш ўрнига Озарбайжонни бундай ҳаракатларда айблаш тарихдан сабоқ олмаслик ҳисобланади”, — дейилади муносабатда.
Бундан ташқари, Боку Ереванни Озарбайжоннинг ички ишларига аралашмасликка чақирди, шунингдек, Озарбайжон—Арманистон чегарасида назорат-ўтказиш пункти яратиш, Арманистон билан чегарада вазиятни кескинлаштириш ва Қорабоғда гуманитар инқирозни юзага келтириш каби айбловларни рад этди.
“Арманистон томони тинчлик шартномаси бўйича музокаралар билан параллел равишда бундай баёнотлар бераётгани тинчликка хизмат қилмайди”, — дея хулоса қилган Озарбайжон ТИВ.
Изоҳ (0)