Қрим озод этилганидан кейин яриморолга ноқонуний келган руслар Украинадан жамоавий эмас, якка тартибда чиқариб юборилади. Бу ҳақда Украина президентининг Қримдаги доимий вакили Тамила Ташева Ukrinform’га берган интервьюсида маълум қилди.
“Барча Россия фуқаролари, аслида, мустамлакачилар, чунки улар босиб олинган ҳудудга унинг демографик таркибини ўзгартириш учун келган. Улар жиноят шериклари ҳисобланади. Агар яриморол озод этилгунга қадар ҳудудни тарк этишмаса, уларни чиқариб юборамиз”, — деди у.
Ташеванинг таъкидлашича, халқаро ҳуқуқда хорижликларни жамоавий чиқариб юборишга рухсат берувчи норма йўқ. Шунинг учун Қримда ноқонуний бўлган ҳар бир Россия фуқароси учун қарор индивидуал равишда қабул қилинади.
Шу билан бирга, Россия фуқаролигини олишга мажбур қилинган украиналиклар ҳамон Украина фуқароси деб тан олинади. Уларга чиқариб юбориш билан таҳдид қилинмайди.
“Буни таъкидлаш жуда муҳим, чунки Россия пропагандаси қримликлар Қримдан чиқариб юборилади, деган ёлғон хабарни тарқатмоқда. Шунинг учун яриморолни фақат кириш шартларини бузган Россия фуқаролари тарк этишини таъкидлайман”, — деди у.
Шуниндек, Ташева Россия фуқаролари, агар хоҳласа, амалдаги тартибларга мувофиқ Украинада яшаш учун рухсатнома олиши мумкинлигини маълум қилди.
Хусусан, бу 2014 йилгача Украина фуқаролигини олишга улгурмаган репатриантлар (ватанига қайтаётган кишилар), сиёсий маҳбусларнинг адвокатлари, ноқонуний қамоққа олинганларнинг қариндоши ва Украинани қўллаб-қувватлаган бошқа шахслар учун мумкин бўлади.
Изоҳ (0)