Тошкент шаҳридаги иситиш тармоқлари гидравлик синовдан ўтказилади. Бу ҳақда пойтахтдаги иссиқ сув ва иссиқлик таъминоти оператори Veolia Energy Tashkent маълум қилди.
Қайд этилишича, иситиш мавсумига тайёргарлик кўриш мақсадида 1 майдан 4 августгача бўлган даврда иситиш тармоқларини механик куч ва зичлик учун юқори босим остида иссиқлик тармоқларининг синовлари ташкил этилади.
Ушбу синовлар иситиш мавсумига юқори сифатли тайёргарлик кўриш ва иссиқ сув таъминоти учун истеъмолчиларни чекламасдан амалга оширилади.
Компания синовлар давомида иссиқлик тармоқлари қувурларининг шикастланиши ва иссиқ сув йўллар ҳамда йўлакларга чиқиши мумкинлигидан огоҳлантирган.
“Ҳайдовчилар, пиёдалар ҳамда маъмурий ва тураржой биноларида яшовчи фуқаролардан эътиборли ва эҳтиёт бўлишларини сўраймиз”, — дейилади хабарда.
Носозликлар ҳақида қуйидаги телефон орқали хабар бериш сўралади: 78 129-01-85. Синов жадвалга мувофиқ ўтказилади, улар билан қуйидаги ҳавола орқали танишиш мумкин.
Тошкент шаҳрида 27 апрелдан 30 майга қадар баҳор-ёзги мавсумга тайёргарлик бўйича катта ҳажмли сув ўтказгич тармоқларида режали профилактика-таъмирлаш ишлари олиб борилиши муносабати билан ичимлик суви режали ўчирилиши маълум қилинганди.
Изоҳ (0)