Ўзбекистоннинг АҚШдаги янги элчиси Фурқат Сиддиқов президент Жо Байден билан учрашиб, ишонч ёрлиқларини топширди. Бу ҳақда у ўзининг Twitter даги саҳифаси орқали маълум қилди.
2017 йилдан бери Ўзбекистоннинг АҚШдаги элчиси сифатида Жавлон Ваҳобов ишлаб келаётганди. 2 апрель куни у Ўзбекистоннинг АҚШ, Канада ва Бразилиядаги элчиси лавозимидаги фаолиятини якунлаб, Ўзбекистонга қайтиб келган. Март бошларида Ўзбекистон ташқи ишлар вазирининг биринчи ўринбосари Фурқат Сиддиқов Ўзбекистоннинг АҚШдаги элчиси этиб тасдиқланган, апрелдан эса у лавозимда иш бошлаган.
Фурқат Сиддиқов 1971 йил 7 февраль куни Тошкент шаҳрида туғилган. 1993 йилда Тошкент давлат техника университетини тамомлаган. Меҳнат фаолиятини УзDaewoo Electronics қўшма корхонаси катта мутахассиси сифатида бошлаган.
2015—2020 йилларда Ўзбекистоннинг Покистондаги фавқулодда ва мухтор элчиси, 2020—2022 йилларда ташқи ишлар вазирининг ўринбосари лавозимларида фаолият юритган. У 2022 йилнинг 14 ноябридан бери ташқи ишлар вазирининг биринчи ўринбосари вазифасида ишлаб келаётганди.
Изоҳ (0)