Тошкент шаҳрида хориждан олиб кирилиши тақиқланган 840 миллион сўмлик ускуналар ушлаб қолинди. Бу ҳақда Божхона бошқармаси ахборот хизмати хабар берди.
Хабарга кўра, ҳолат “Аркбулоқ” ташқи иқтисодий фаолият божхона постида Контрабандага қарши курашиш бўлими ҳамда ушбу пост ходимлари томонидан аниқланган. Хориждан пойтахтдаги корхона номига келтирилган, “эркин муомалага чиқариш” божхона режимига расмийлаштириш учун тақдим этилган 14 дона трансформатор қисмлари товарлари ходимлар томонидан белгиланган тартибда божхона кўригидан ўтказилди.
Ўтказилган текширувлар натижасида қиймати 840 миллион сўмни ташкил этувчи трансформатор қисмларида, ёрлиқларида 2009 йилда ишлаб чиқарилгани, муқаддам фойдаланишда бўлгани аниқланди.
Мамлакатга 2019 йил 1 сентябрдан бошлаб илгари фойдаланилган генератор ускуналари, кучланишни пасайтирувчи трансформаторлар, электр двигателлар, шунингдек, энергия самарадорлиги D тоифадаги энергия сарфловчи ускуналарни олиб кириш тақиқланган.
Изоҳ (0)