Шавкат Мирзиёев 2-3 май кунлари Германияга ташриф буюради. Ташриф дастурига мувофиқ, Германиянинг етакчи компаниялари билан инновацион-технологик шерикликни кенгайтиришга қаратилган истиқболли лойиҳа ва дастурларни амалга оширишга алоҳида эътибор қаратилади.
Германия - Ўзбекистон ишбилармонлар кенгаши ижрочи директори Фалк Порше икки давлат ўртасидаги тадбиркорлик соҳасидаги ҳамкорлик юзасидан фикрларини билдириб ўтди.
Фалк Поршенинг айтишича, Ўзбекистон иқтисодиёти жадал ривожланмоқда.
“Рақобатбардош устунликларимиз бирлаштириш бизнесни ривожлантириш учун катта имкониятлар яратади. Шу боис ўтган йили Марказий Осиёда биринчи ва ягона бўлган толали шиша ишлаб чиқарувчи заводни ишга туширдик. Навбатдаги истиқболли қўшма дастурлар бизни кутмоқда. Ўзбекистон иқтисодиёти барқарор ривожланмоқда, Хорижий сармоядорларнинг қизиқиши юқори”, — дейди у.
Мутахассис сўнгги йилларда Ўзбекистон президенти ташаббуси билан кенг кўламли ислоҳотлари амалга оширилганини алоҳида таъкидлаб, ишбилармонлик муҳити яхшиланганини айтди.
“Ўзбекистон раҳбарининг Германияга иккинчи марта амалга ошираётган бўлажак ташрифи мамлакатларимиз ўртасидаги иқтисодий алоқаларни янада кенгайтиради. Шунингдек, сиёсий мулоқотни чуқурлаштириш, сармоявий ва молиявий ҳамкорликни кенгайтириш, маданий, гуманитар, илмий-маърифий алоқаларни, сайёҳлик алмашинувини фаоллаштириш масалалари юқори даражада муҳокама қилиниши ҳам муҳим аҳамиятга эга.
Германия – Ўзбекистон ишбилармонлар кенгаши ижрочи директори сифатида яна бир бор таъкидламоқчиманки, немис компаниялари Ўзбекистонга сармоя киритишга катта қизиқиш билдирмоқда. Бизнинг тузилмамиз эса мамлакатлар ўртасида муҳим боғловчи кўприк вазифасини ўтайди”, — дейди Фалк Порше.
Изоҳ (0)