Ижтимоий тармоқларда олий таълим муассасалари ходимлари талабаларни уларнинг эркига зид равишда референдумда қатнашишга чорлаётгани ҳақида хабарлар тарқалди. Ҳолат бўйича Олий таълим, фан ва инновациялар вазирлиги матбуот хизмати муносабат билдирди.
Вазирлик ўз қонунчиликка мувофиқ Ўзбекистон фуқароларининг референдумда иштирок этиши ихтиёрий ва эркиндир. Фуқароларни референдумда иштирок этишга ёки иштирок этмасликка мажбур қилиш мақсадида уларга, шунингдек хоҳиш-иродасини эркин билдиришига таъсир кўрсатишга ҳеч ким ҳақли эмаслигини эслатиб ўтди.
“Барча олий таълим муассасалари раҳбарияти ва масъул ходимлари қонунчилигимиздаги ушбу талаблардан хабардор этилган ва тизимда мазкур талабларга риоя этилиши вазирликнинг алоҳида назоратидадир. Вазирлик талабаларнинг референдумда иштирок этиши ихтиёрий ва эркин бўлишини таъминлаш борасида қатъий позицияга эга”, — дейилади муносабатда.
Вазирлик талабалар бу борадаги ҳуқуқлари бирон-бир тарзда бузилаётган бўлса, +998712071762 рақамига ёки тегишли ҳуқуқни муҳофаза қилиш органларига хабар беришларини сўради ва айбдорларга тегишли чоралар кўрилиши таъминланишини қўшимча қилди.
Ўзбекистонда 30 апрель куни соат 8:00 дан 10 минг 758 участкада Конституциянинг янги таҳрири бўйича референдум бошланди. Сайловчилар ягона электрон рўйхатига 19 миллион 722 минг 809 нафар овоз берувчи фуқаро киритилган.
Марказий сайлов комиссияси раиси Зайниддин Низомхўжаев Ўзбекистон фуқароларини референдумда иштирок этишга ёки иштирок этмасликка мажбур қилиш мақсадида уларга, шунингдек хоҳиш-иродасини эркин билдиришига таъсир кўрсатишга ҳеч ким ҳақли эмаслигини, фуқароларнинг ўз хоҳиш-иродасини билдириши назорат қилинишига йўл қўйилмаслигини таъкидлаб ўтганди.
Изоҳ (0)