“Маҳалламизда 1 855 нафар фуқаро овоз бериши кутилмоқда” — референдум участкаси раиси Баҳодир Халлакав

Бугун, 30 апрель — Ўзбекистонда референдум куни. Республикада ташкил этилган жами 10 минг 758 та участкада фуқаролар Конституцияга ўзгартириш ва қўшимчалар киритиш бўйича овоз бермоқда. “Дарё” мухбири Тошкент шаҳридаги бир неча участкаларда бўлиб, жараённи ўрганди.

Яккасарой туманидаги 275-референдум участкаси раиси Баҳодир Халлакавнинг айтишича, “Боғсарой” маҳалласида жами 1 855 нафар фуқаро овоз бериши кутилмоқда.

“Тошкент шаҳрида референдум қизғин давом этмоқда. Бизнинг маҳалладан ҳам фуқаролар жараёнда фаол қатнашмоқда. Буни икки соат ичида 200 нафардан ортиқ киши овоз берганидан ҳам англаш мумкин”, – деди у.

Эслатиб ўтамиз, Ўзбекистон Конституциясига қарийб 27 та янги модда ва 159 та норма киритилмоқда. Ҳужжатда давлат бошқарувчи, парламент, инсонларнинг сиёсий, шахсий ҳуқуқ ва эркинликлари ҳамда бошқа бир қатор масалалар аввалгисидан кенгроқ қамраб олинмоқда.

Марказий сайлов комиссияси маълумотларига кўра, республикада референдумда жами 19 миллион 722 минг 809 нафар фуқаро рўйхатга овоз бериши кутилмоқда. Соат 13:00 ҳолатига кўра қарийб 12 миллион фуқаро ёки умумий овоз берувчиларнинг 62,24 фоизи референдумда овоз берди.