Хориждаги қарийб 160 минг Ўзбекистон фуқаролари референдумда муддатидан олдин овоз берди

Хориждаги 159 276 нафар Ўзбекистон фуқаролари  референдумда муддатидан олдин овоз берди. Бу ҳақда Ташқи ишлар вазирлиги ахборот хизмати маълум қилди.

Хабарга кўра, Ўзбекистоннинг хориждаги элчихона ва Бош консулхоналари томонидан 19-26 апрель кунлари референдумнинг муддатидан олдин овоз бериш жараёнлари амалга оширилди. Ўзбекистон фуқаролари зич жойлашган 40 та хорижий давлатда, жумладан дипломатик ваколатхоналар мавжуд бўлмаган шаҳарларда қўшимча равишда жами 1003 та муддатдан олдин овоз бериш нуқтаси ташкил этилди.

Ушбу муддатдан олдин овоз бериш жараёнида 159 276 нафар фуқаро ўз конституциявий ҳуқуқларидан фойдаланди. Хориждаги ваколатхоналар томонидан муҳим сиёсий тадбирни юқори савияда ўтказиш мақсадида ватандошлар, хорижий оммавий ахборот воситалари ва чет эл расмийлари иштирокида 500 дан зиёд тушунтиришлар, брифинг ва учрашувлар ташкил қилинди.

Ҳозирги вақтда Ўзбекистоннинг дипломатик ваколатхоналари ва консуллик муассасалари мавжуд бўлган 39 та давлатда 55 та референдум участкаси ташкил этилган. Хориждаги референдум жараёнларининг дастлабкиси 30 апрель куни Япония ва Кореядаги дипломатик ваколатхоналарда Тошкент вақти билан соат 04:00 да бошланиб, сўнггиси Америка Қўшма Штатларидаги ваколатхоналарда 1 май куни соат 05:00 да якунланиши маълум қилинди. 

Ҳозирги вақтда мамлакатнинг Шарқ ва Осиё мамлакатларидаги дипломатик ваколатхоналарида, хусусан, Япония, Корея, Сингапур, Малайзия, Индонезия, Ҳиндистон, шунингдек, Россиянинг Владивосток, Новосибирск, Екатеринбург шаҳарларида ҳамда қўшни мамлакатларда овоз бериш жараёни бошланди.