Ўзбекистонда 30 апрель куни референдум ўтган деб ҳисобланди. Бу ҳақда Марказий сайлов комиссияси раиси ўринбосари Баҳром Қўчқоров маълум қилди.
Марказий сайлов комиссияси маълумотларига кўра, соат 13:00 ҳолатига умумий овоз берувчиларнинг 62,24 фоизи референдумда овоз берди. “Ўзбекистон Республикасининг референдуми тўғрисида”ги қонуннинг 38-моддасига кўра, овоз беришда иштирок этган фуқароларнинг ярмидан кўпроғи ёқлаб овоз берган бўлса, қарор референдумда қабул қилинган деб топилади.
Овоз бериш бўйича энг юқори фаоллик Жиззах, Андижон ва Сирдарё вилоятларида (66-67 фоиз) қайд этилди.
Сайловчилар ягона электрон рўйхатига 19 миллион 722 минг 809 нафар овоз берувчи фуқаро киритилган. Шу жумладан, хорижий давлатларда тузилган 55 та референдум участкасидаги овоз берувчилар рўйхатидан 307 минг 895 нафар фуқаро ўрин олган.
Референдумни жами 383 нафар халқаро кузатувчи, жумладан 14 та нуфузли халқаро ташкилотдан 184 нафар, 45 та давлатдан 199 нафар халқаро кузатувчилар бевосита кузатиб бормоқда. Бундан ташқари, сиёсий партиялар ва фуқароларнинг ўзини ўзи бошқариш органларидан жами 43 мингдан ортиқ маҳаллий кузатувчилар бевосита кузатувда иштирок этмоқда.
Янгиланаётган Конституция
Референдумда “Ўзбекистон Республикаси Конституцияси тўғрисида”ги конституциявий қонун лойиҳаси овозга қўйилган. Маълумки, бу жараёнга бир ярим йил мобайнида пухта тайёргарлик кўрилди. Конституциявий қонун лойиҳаси оммавий ахборот воситаларида эълон қилиниб, халқнинг фикри ўрганилди. Жамоатчилик томонидан 220 мингдан зиёд таклифлар келиб тушди. Уларнинг ҳар тўрттасидан биттаси лойиҳадан жой олди.
Ушбу таклифлар асосида янгиланаётган Конституцияга 27 та янги модда киритилди. Яъни, моддалари сони амалдаги 128 тадан 155 тага, нормалари 275 тадан 434 тага ошди. Асосий қонуннинг 65 фоиз матни халқ таклифлари асосида янгиланди. Бунда халқаро тажриба ҳам инобатга олинди, турли соҳалардан етук мутахассислар ва экспертлар жалб этилди.
Конституция тўғридан-тўғри ишлайдиган ҳужжат бўлмоқда. Яъни энди барча фуқаролар ҳаттоки ўзининг кундалик ҳаётида ҳам Конституцияга мурожаат қилади. Ундаги барча нормалар, уларни қандай амалиётда қўллашни очиб берувчи қонунчилик ҳужжати мавжуд ёки мавжуд эмаслигидан қатъи назар, тўғридан-тўғри ишлайди.
Изоҳ (0)