Наманган вилоят божхона бошқармаси, ДХХ ҳамда ИИБ ходимлари томонидан ўтказилган тезкор тадбир давомида вилоят ҳудудига ноқонуний олиб кирилган катта миқдордаги тамаки маҳсулотлари аниқланди. Бу ҳақда “Дарё” мухбири хабар бермоқда.
Наманган шаҳрининг Давлатобод тумани “Орзу” маҳалласидаги хонадонлардан бирида ўтказилган текширув давомида хонадон ертўласи ва автомобиль салонида хорижда ишлаб чиқарилган, айланма йўллар орқали олиб кирилган ва тегишли ҳужжатлари бўлмаган 28 980 қути тамаки маҳсулотлари борлиги маълум бўлди.
Терговга қадар текширув давомида хонадон соҳибаси ўзига аввалдан таниш бўлган чегарадош туманда яшовчи 32 яшар йигитдан ушбу маҳсулотларни қабул қилиб олгани ва кейинчалик муомалага киритиш мақсадида ертўла ҳамда автомобиль салонига жойлаштиргани аниқланди. Баҳолаш идораси мутахассисларининг хулосасига кўра, 4 турдаги тамаки маҳсулотларининг бозор баҳоси қарийб 250 миллион сўмни ташкил этади.
Ҳозирда мазкур ҳолат юзасидан жиноят иши қўзғатилган ва суриштирув ишлари олиб борилмоқда.
Изоҳ (0)