Сьерра-Леоне Республикаси Ўзбекистон билан дипломатик муносабатлар ўрнатган 143-давлатга айланди. Бу ҳақда “Дунё” агентлиги хабар берди.
Қайд этилишича, 28 апрель куни Нью-Йоркда Ўзбекистон билан Сьерра-Леоне ўртасида дипломатик муносабатлар ўрнатиш тўғрисида Қўшма коммунике имзоланди. Икки давлат ҳукумати номидан ҳужжатни Ўзбекистоннинг БМТдаги доимий вакили Бахтиёр Ибрагимов ва Сьерра-Леоненинг БМТдаги доимий вакили Алхаджи Фанд Турай имзолаган.
Ушбу давлат Ғарбий Африкада Атлантика океани соҳилида жойлашган, Британия Ҳамдўстлиги, ИҲТ, Қўшилмаслик ҳаракати ва бошқа халқаро ташкилотлар аъзоси.
Томонлар халқаро ташкилотлар, жумладан, БМТ ва унинг ихтисослашган муассасалари доирасида қўшма ҳамкорликни мустаҳкамлашдан манфаатдор эканини тасдиқлаган. Ҳамкорликнинг ўзаро манфаатли йўналишларини излаш учун икки томонлама алоқаларни давом эттириш бўйича келишувга эришилган.
Сўнгги йиллардаги дипломатик муносабатлар
2021 йилнинг майида Доминика Ўзбекистон дипломатик алоқалар ўрнатган 137-, Панама 138-давлат бўлганди. 2022 йил 9 март куни мамлакатимиз Сент-Китс ва Невис Федерацияси билан дипломатик алоқалар ўрнатган эди. 10 май куни Сент-Винсент ва Гренадин ороллари Ўзбекистон билан дипломатик муносабатлар ўрнатган 140-мамлакат бўлганди.
2022 йил июнда эса Антигуа ва Барбуда билан дипломатик муносабатлар ўрнатилган. Ўша йилнинг ноябрида Гаяна Кооператив Республикаси Ўзбекистон билан дипломатик муносабатлар ўрнатган 142-давлат бўлганди.
Изоҳ (0)