Хитой АҚШнинг Тайванга қурол жўнатиш қароридан ҳафсаласи пир бўлди ва Вашингтонга бу борадаги норозилигини билдирди, деди Хитой Мудофаа вазирлиги матбуот котиби Тан Кефей брифингда.
28 февраль куни АҚШ Тайванга 619 миллион долларлик қурол-яроғ етказиб беришни маъқуллаган эди.
“Биз Қўшма Штатлардан Тайван билан ҳарбий алоқаларни ва Тайванга қурол сотишни тўхтатишни, Тайван масаласига аралашиб, Тайван бўғозидаги кескинликни кучайтиришни бас қилишни талаб қиламиз”, — деди Тан Кефей. У Вашингтонни Хитой—АҚШ келишувлари ва “ягона Хитой” тамойилини бузганликда айблади.
Тайван ва материк Хитой ўртасидаги муносабатлар АҚШ Конгресси Вакиллар Палатаси Ненси Пелосининг август ойида оролга ташрифидан кейин кескинлашди. Шундан сўнг Пекин Тайван бўғози ҳудудида ҳарбий машғулотларни бошлади ва орол яқинига ҳарбий кучларини тўплади.
Қўшма Штатлар Пелосининг келиши “ягона Хитой” тамойилига зид эмаслигини ва Вашингтоннинг бу борадаги сиёсати ўзгаришини англатмаслигини таъкидлади. Шу билан бирга, 1979 йилдан бери АҚШда Тайван хавфсизлигига ташқи таҳдидлар юзага келган тақдирда, Вашингтон уни қурол-яроғ билан таъминлаши мумкин бўлган қонун амал қилади. Февраль ойида Тайван президенти Сай Инвен АҚШ билан ҳарбий алоқаларни кенгайтиришда давом этишига ваъда берганди.