Open budget машмашаси давом этади: қашқадарёликлар пуллар беҳуда совурилаётганини айтмоқда (видео)

Сал аввалроқ тармоқларда одамларнинг Open budget’га овоз йиғиб, битта овозга битта Pepsi, беш минг сўм пул ёки бир ярим кило олма ваъда қилгани ёхуд учта овоз учун бир товуқ беришга розилиги айтилган видеолар тарқалганди. Бугун эса тармоқларни шундай машаққатлар эвазига қўлга киритилган маблағ самарасиз сарфланаётгани айтилган видеолар тўлдирмоқда. Жумладан, Қашқадарё вилоятининг Яккабоғ туманида яшовчи аҳоли вакиллари “Дарё”га мурожаат қилиб, одамларнинг не-не машаққатлари эвазига қўлга киритилган маблағлар беҳуда совурилаётганини айтди. “Дарё” бугун мазкур мавзу атрофида сўз юритади.

Яккабоғ туманининг Бехўжа қишлоғида яшовчи аҳоли вакиллари асфальт ётқизиш ишлари сифатсиз бажарилаётганини, буни масъуллар назорат қилмаётганини айтмоқда.

“Асфальт жуда юпқа ётқизилмоқда. Биз бундан норози бўлиб, ишлар сифатли бўлишини талаб қиляпмиз. Аммо иш бажарувчи ташкилотнинг номи йўқ, сўрасак, айтишмайди”, — дейди аҳоли вакилларидан бири.

Мурожаатчиларнинг айтишича, лойиҳада асфальтнинг қалинлиги 6,5 см бўлиши кўрсатилгани, текисланиб, тайёр ҳолатга келгач эса 5 см бўлиши кераклиги, айни пайтда эса асфальт 1,5—2 см қалинликда ётқизилаётгани билдирилмоқда.

“Open budget’нинг пулини қўлга киритиш учун аҳоли югургандир. Аммо бу пуллар ҳам давлатнинг, халқнинг пули-ку. Ишни бунақа ҳолатда бажариш пулни кўчага совуриш-ку. Буни назорат қилувчи ташкилотлар борми?”, — дейди видеодаги яна бир суҳбатдош.

Бу ҳолатга эътибор қаратган Яккабоғ тумани ҳокимлиги Яккабоғ туманининг “Қишлиқ” МФЙ Бехўжа қишлоғидаги ички йўлнинг 2,2 км қисми “Очиқ бюджет” дастури орқали асфальтлаштирилаётганини тасдиқлаб, ушбу ишларни тендерда ғолиб бўлган “Асбоб Сервис жиҳозлари” МЧЖ масъуллари бажараётганига аниқлик киритган.

Таъкидланишича, айни кунга қадар қишлоқнинг 2,1 километр йўли асфальтлаштириб бўлинган.

“Асфальтлаштириш ишлари давомида асфалт қуйиш махсус техникаси носоз ҳолга келиб қолгани сабабли техника ичида қолган асфальт маҳсулоти қотиб қолишининг олдини олиш мақсадида асфалт қўл кучи ёрдамида йўлга ёйиб олинган. Асфальт қуйиш махсус техникаси соз ҳолатга келтирилгач, қолган 140 метр йўлда ҳам норма бўйича ишлар давом эттирилади”, — дейилади ҳокимликнинг мазкур муаммо юзасидан фикр билдирган муносабатида.

Аҳолининг тармоқларда тарқатаётган видеосида қишлоқдаги асфальтлаштириш ишлари сифатсиз бажарилгани бот-бот айтилган бўлса-да, мазкур йўл таъмирига масъул ташкилот — туман Ободонлаштириш бошқармаси бошлиғи Сафар Суюнов йўл таъмири сифати кўнгилдагидек эканини айтмоқда. Унинг қўшимча қилишича, асфальт ётқизилган 2,1 км йўлнинг 2 километридаги ишлар сифатли бажарилган, сўнгги 100 метрдаги асфалтлаштириш сифатсиз бўлгани боис қайта қилинади.

“Одамларга озгина баҳона керак. Улар асфальтлаштириш ишлари сифатсиз бажарилганини айтиб, видео тарқатишгач, воқеа жойига бордим. 2,1 километр йўлнинг 2 километридаги асфальтлаштириш ишлари сифатли бажарилган. Тўғри, кейинги 100 метрдаги асфальт жуда юпқа ҳолатда бўлган. Шу боис тадбиркор билан гаплашиб, кейинги 100 метрни қайта қилишга келишиб олдик. Бу масалада ҳеч қандай муаммо бўлмайди”, — дейди Сафар Суюнов.

Вилоятнинг Шаҳрисабз тумани “Сайёд” МФЙда яшовчи аҳоли вакиллари президентнинг 408-сонли қарорига кўра таъмирланаётган йўл ҳам сифатсиз таъмирланаётганини айтиб, шикоят қилмоқда.

“Мол юрса, оёғи тошга тегувчи асфальтни назорат қилувчи ташкилотлар йўқми? Асфальтлаштиришда стандарт бўлади-ку, йўлнинг аҳволи жуда ачинарли-ку”, — дейди йўлнинг сифатсизлигидан шикоят қилган видео муаллифи.

Шаҳрисабз тумани ҳокимлиги ахборот хизматининг жамоатчиликка маълумот беришича, президентнинг 408-сонли қарори билан туманнинг “Сайёд” МФЙ ҳудудидаги 4,42 километр ички йўл таъмирланмоқда.

“Энди маҳалланинг уч километридан зиёд қисмига асфальт, бир километр қисмига эса бетон қопламалари ётқизилади. Ушбу қурилиш ишлари учун 2 миллиард 650 миллион сўм маблағ йўналтирилган”, — дейди ҳокимлик масъуллари.

“Дарё” воқеалар ривожини кузатишда давом этади.