Тошкент шаҳрининг Шайхонтоҳур туманидаги “Илғор” маҳалласининг Боғ 2-тор кўчасида яшовчи аҳоли вакиллари “Дарё”га мурожаат қилиб, маҳалланинг катта кўчага олиб чиқувчи асосий кўчаси 2016 йилда ёпилгани боис маҳалладаги мавжуд 20-30 та тор кўча аҳолиси иккинчи тор кўча орқали Нурафшон кўчасига чиқаётганини, бу эса тирбандликлардан безор бўлган аҳоли норозилиги-ю ёш болалар ҳаётига хавф солаётганини билдирмоқда.
“Дарё” журналисти воқеа тафсилотларини ўрганиш мақсадида ушбу кўчада бўлди.
“Нурафшон кўчаси очилиши муносабати билан маҳалладан катта кўчага олиб чиқувчи барча тор кўчаларни ёпиб ташлашгани боис бизнинг кўчада машиналар оқими ортди. Энг ёмони, ҳайдовчилар бир-бирига йўл бермайди. Эрталаб ва кечки пайт роса тиқилинч бўлади. Баъзи ҳайдовчилар эса катта тезликда юришади. Ёш болаларимиз шу кўчада ўйнайди. Велосипед ҳайдайди. Шу сабаб ҳам машиналар оқимининг ортиши болалар ҳаёти учун хавфли бўлиб қолди. Масъуллар 1-, 3- ва 4-кўчаларни очиб юбориб, бизнинг кўчадаги машиналар оқимини камайтиришларини сўраймиз”, — дейди Равил ака исмли суҳбатдош.
Шу маҳаллада яшовчи Йўлдош Рўзиевнинг айтишича, асосий Боғ кўча ёпиб ташлангани боис нафақат “Илғор” маҳалласидаги тор кўчалар, “Тинчлик” маҳалласида яшовчи аҳоли ҳам катта кўча тирбанд бўлган пайтда айнан шу — иккинчи тор кўча орқали Нурафшон кўчасига ўтиб-қайтади.
“Асосий боғ кўчанинг ёпиб ташлангани сабаб барча тор кўчалар, ‘Тинчлик’ маҳалласида яшовчи одамлар ҳам машинасида айнан бизнинг 2-тор кўча орқали Нурафшон кўчасига ўтиб-қайтади. Биз эса болаларимиз, набираларимиз тақдиридан хавотирда ўтирамиз. Бизни безовта қилиб ташлашди”, — дейди Йўлдош Рўзиев.
Шу маҳаллада яшовчи Сабоҳат Зокированинг айтишича, ҳудуддаги мавжуд 20 дан ортиқ хонадон вакиллари болаларининг кўчага чиқиб ўйнашидан қўрқиб, юрак ҳовучлаб ўтиради.
“Болаларимиз тўп олиб чиқиб, ўйнаймиз дейишса, машина келиб қолади. Маҳалламизда болалар ўйингоҳи йўқлиги боис кўчада ўйнаймиз дейди”, — дейди Сабоҳат Зокирова.
Аҳолининг “Дарё”га билдиришича, улар бу муаммо юзасидан туман ҳокимлиги ва масъул ташкилот раҳбарларига мурожаат қилиб, шикоятдан хабардор қилган.
“Мурожаат қилдик, маблағ билан боғлиқ муаммо бор деб, масалани ортга ташлашди. Бу муаммога эътиборсизлик эртага бирор-бир катта фожианинг келиб чиқишига сабаб бўлиши мумкин. Чин дилдан ҳаракат қилишса, маблағ масаласи ҳам ҳал этилади-ку. Бу кўчаларни очиш учун унча катта маблағ талаб қилинмайди”, — дейди аҳоли вакиллари.
Ҳудуд вакилларидан яна бири Ботир Ҳошимовнинг айтишича, эрталаб ва кечки пайтдаги тирбандлик сабаб иккинчи тор кўчада умуман ҳаракатланиб бўлмайди.
Шу маҳалладаги Мавлуда Мирсоғатованинг айтишича, масъуллар ҳудуд аҳолисини қийнаб келаётган муаммога эътибор қаратиб, юзага келаётган тирбандликлар ва ЙТҲларнинг олдини олиши керак.
“Эрталаб, кечки пайт машиналар шунақа кўп ўтадики, уларнинг шовқини, бир-бирига урилиб кетиши бизнинг юрак ҳовучлаб ўтиришимизга сабаб бўлади. Шу тор кўча юзидаги домда касаллиги бор, кекса отахон ва онахонлар яшайди. Буни ҳисобга олишлари керак. Барча кўчаларнинг катта йўлга чиқувчи қисмини очиб юбориб, бизнинг кўчадаги машиналар оқимини камайтиришлари керак. Шунда адолатли бўлади”, — дейди Мавлуда опа.
“Дарё” аҳоли эътирозига сабаб бўлаётган воқеа юзасидан Шайхонтоҳур тумани ҳокимлиги масъуллари билан боғланди. Ҳокимлик вакили муаммодан етарли даражада хабардор эмаслигини, вазият билан танишиб чиққач, бу ҳақда таҳририятга аниқ маълумот беришини маълум қилди.
Изоҳ (0)