Тошкентда бир йилда қанча ер майдони сотилгани маълум қилинди

Кадастр агентлиги маълумотига кўра, Тошкентда 2022 йилда жами 327 та — 92,42 гектар ер майдони 562,28 миллиард сўмга сотилган.

Ер назорати йўналишда Кадастр агентлиги Тошкент шаҳар бошқармаси томонидан олиб борилган тадбирлар давомида 2022 йилда Тошкент шаҳри бўйича аҳоли яшаш манзилларида умумий 3 118 та ҳолатда (38,73 гектар) ер қонун бузилиши ҳолатлари аниқланган.

Шундан, Маъмурий жавобгарлик тўғрисидаги кодекснинг 60-моддасига (табиий ресурсларга эгалик ҳуқуқини бузиш) асосан 1579 та, 68-1-моддасига (кўчмас мулкка бўлган ҳуқуқни давлат рўйхатидан ўтказиш учун ўз вақтида мурожаат этмаслик) асосан 1490 та ва 68-моддасига (ер тузиш лойиҳаларидан ўзбошимчалик билан четга чиқиш, давлат ер кадастри юритиш қоидаларини бузиш) асосан 49 та ҳуқуқбузарлик ҳолатлари аниқланган. 

1579 та ҳолатда (25,81 гектар) ер майдонлари ўзбошимчалик билан эгаллаб олиниши аниқланган. Шундан, 385 та ҳолатда 4,12 гектар  ер фуқаролар томонидан ихтиёрий равишда бартараф этилиб, асл ҳолатига қайтарилган. Қолган 1194 та ҳолат юзасидан суд тартибида кўриб чиқиш учун суд органларига даъво аризалари киритилган.

Тошкент шаҳрида 2023 йилда ер қонунчилигига риоя этилиши аҳволини ўрганиш ва ерларни ўзбошимчалик билан эгаллаш ҳамда ноқонуний қурилмаларни бартараф қилиш юзасидан “Йўл харитаси” ва Йиллик чора-тадбир ишлаб чиқилган.

Мазкур йўналишларда график асосида Тошкент шаҳрининг барча ҳудудларида ер назорати тадбирларини амалга ошириш, фуқаролар ва тадбиркорлик субъектларини қийнаб келаётган муаммоли масалаларни жойида ўрганиш ва ҳал қилиш мақсадида бошқарма бошлиқлари томонидан туманларда сайёр қабуллар ўтказилиши режалаштирилган.