“Ан-Насср” раҳбари истеъфо берди. Клуб директорлар кенгаши тарқатиб юборилиши мумкин

Саудия Арабистонининг “Ан-Насср” клуби раҳбариятида ўзгаришлар содир бўлди.

Saudi Gazette хабарига кўра, Ар-Риёд клуби директорлар кенгаши раҳбари Мусалли ал-Муаммар истеъфога чиқаришларини сўраб, Спорт вазирлигига ариза юборган.

Жамоанинг кетма-кет мағлубияти, хусусан, кубокдан чиқиб кетгани мухлисларда норозилик уйғотган. Шу боис катта босим остида қолган раҳбар бўшашга ариза ёзгани айтилмоқда.

Қайд этилишича, ариза икки кун ичида қабул қилинади. Клубнинг ҳозирги директорлар кенгаши эса тарқатиб юборилади. Шундай бўлган тақдирда “Ан-Насср”ни бош котиб бошқариб туриши тахмин қилинмоқда.

Ал-Муаммар 2021 йилнинг 1 апрелидан бери клубни бошқариб келаётганди. Аввалроқ у Саудия Арабистони лигасига раҳбарлик қилган.

Аввалроқ “Ан-Насср” муваффақиятсиз натижалардан кейин жамоа бош мураббийи Руди Гарсия истеъфога чиқарилганди.

“Ан-Насср” Саудия Арабистони Кубоги ярим финалида “Ал-Ваҳда”га ютқазиб, мусобақа билан хайрлашди. Лигада эса етакчи “Ал-Иттиҳод”дан 3 очкога ортда қолмоқда.

Жамоа ҳужумчиси Криштиану Роналду қаторасига учта ўйиндан бери гол ура олмаяпти.