Халқаро спорт арбитраж суди (CAS) “Бунёдкор”нинг Жавлон Иброҳимовдан қарздорлиги масаласи бўйича клуб тақдим этган арзномани қаноатлантирмади. Бу ҳақда ПФЛ матбуот хизмати маълум қилди.
Қайд этилишича, 2020 йилнинг декабрь ойида Иброҳимов ЎФА Футболчилар мақоми ва ўтиши бўйича қўмитасига арз киритган. Унда клуб футболчи олдидаги молиявий мажбуриятини тўлиқ бажармагани даъво қилинган. Қўмита ишни ўрганиб, “Бунёдкор” футбол олдидаги қарзни тўлаши лозимлиги борасида қарор чиқаради.
Бироқ “Бунёдкор” ушбу қарордан норози бўлиб, ЎФА Апелляция қўмитасига шикоят киритади. 2021 йилнинг 25 май куни Апелляция қўмитаси ҳам футболчини ҳақ деб ҳисоблаб, қарорни ўзи кучида қолдирди.
Ҳар икки ишни бой берган Тошкент клуби 2021 йилнинг 14 июнь санасида Халқаро спорт арбитраж судига мурожаат қилади. CAS ушбу масала юзасидан 25 апрель куни қарор чиқарди. Унга кўра, ташкилот ЎФА Апелляция қўмитасининг 2021 йил 25 майдаги қарорини ўз кучида қолдириш юзасидан қарор чиқарган
Эндиликда “Бунёдкор” собиқ футболчиси Жавлон Иброҳимов олдидаги қарзларини тўлаб бериши керак бўлади. Қўшимчасига, “Бунёдкор” узоқ давом этган жараён учун суд харажатларини ҳам тўлиқ қоплаши талаб этилади. ПФЛ баёнотида қайд этилишича, суд харажатлари Иброҳимовга аввал бошидан тўланиши лозим бўлган миқдордан кам эмас.
Изоҳ (0)