“An-Nassr” rahbari iste’fo berdi. Klub direktorlar kengashi tarqatib yuborilishi mumkin

Saudiya Arabistonining “An-Nassr” klubi rahbariyatida o‘zgarishlar sodir bo‘ldi.

Saudi Gazette xabariga ko‘ra, Ar-Riyod klubi direktorlar kengashi rahbari Musalli al-Muammar iste’foga chiqarishlarini so‘rab, Sport vazirligiga ariza yuborgan.

Jamoaning ketma-ket mag‘lubiyati, xususan, kubokdan chiqib ketgani muxlislarda norozilik uyg‘otgan. Shu bois katta bosim ostida qolgan rahbar bo‘shashga ariza yozgani aytilmoqda.

Qayd etilishicha, ariza ikki kun ichida qabul qilinadi. Klubning hozirgi direktorlar kengashi esa tarqatib yuboriladi. Shunday bo‘lgan taqdirda “An-Nassr”ni bosh kotib boshqarib turishi taxmin qilinmoqda.

Al-Muammar 2021-yilning 1-aprelidan beri klubni boshqarib kelayotgandi. Avvalroq u Saudiya Arabistoni ligasiga rahbarlik qilgan.

Avvalroq “An-Nassr” muvaffaqiyatsiz natijalardan keyin jamoa bosh murabbiyi Rudi Garsiya iste’foga chiqarilgandi.

“An-Nassr” Saudiya Arabistoni Kubogi yarim finalida “Al-Vahda”ga yutqazib, musobaqa bilan xayrlashdi. Ligada esa yetakchi “Al-Ittihod”dan 3 ochkoga ortda qolmoqda.

Jamoa hujumchisi Krishtianu Ronaldu qatorasiga uchta o‘yindan beri gol ura olmayapti.