Наманганнинг “Навбаҳор” клуби россиялик мураббий Андрей Канчельскис билан тўлиқ ҳисоб-китоб қилди.
ОФК назорати остида ўтадиган лицензиялаш жараёни якунига яқинлашди. Унинг энг муҳим мезонларидан бири — клубнинг амалдаги ёки собиқ футболчи ҳамда мураббийларидан қарздорлиги бўлмаслигидир.
Канчельскис 2020 йилда маошларини вақтида олмагани учун “Навбаҳор” билан шартномани бекор қилганди. Шундан сўнг у қолиб кетган маошларини ундириш учун ФИФАга ариза ёзгани ҳақида хабар берилганди. ФИФА Футболчилар мақоми ва ўтиши қўмитаси 2021 йилнинг 25 август куни “Навбаҳор” футбол клуби ва унинг собиқ бош мураббийи Андрей Канчельскис ўртасидаги низоли вазият юзасидан қарор чиқарган ва россиялик мутахассис даъвосини қисман қондириб, “Навбаҳор” футбол клуби собиқ бош мураббийига тўлов амалга ошириши лозимлигини белгиланган эди. Шунингдек, яна бир собиқ мураббий Алексей Беленков бўйича ҳам низоли вазият мавжуд эди. Кейинроқ футбол клуби ва икки мутахассис ўртасида тинчлик битими имзоланиб, қарздорлик келишилган муддатлар оралиғида бўлиб тўланишига келишилганди.
26 апрель куни “Навбаҳор” Канчельскис билан тўлиқ ҳисоб-китоб қилгани маълум қилинди. Шу тариқа Андрей Канчельскис тўловнинг якуний қисмини қабул қилиб олганини ёзма равишда тасдиқлаган. “Навбаҳор” эса россиялик собиқ мураббийлари олдидаги молиявий мажбуриятларини тўлиқ бажарган.
Изоҳ (0)