Марҳамат туманида ҳоким топшириғига кўра, ишдан ташқари вақт — кечаси 21:00 дан кейин ишга чақирилган ободонлаштириш ходими йўлда ЙТҲgа учраб, вафот этгани хабар қилинганди. “Дарё” манбаси туман Ободонлаштириш бошқармаси ходимлари 25 апрель куни кечки пайт соат 21:00 дан кейин шоир Муҳаммад Юсуф қабрини ободонлаштириш учун мажбурий меҳнатга жалб қилинганини билдирди.
“Дарё” мухбири воқеа тафсилотларига аниқлик киритиш мақсадида журналистик суриштирув ўтказди.
Марҳума Арофатхон Жалолиддинованинг турмуш ўртоғи Иминжон Мамажоновнинг айтишича, ўша куни кечки пайт бригада бошлиғи хотинига телефон қилиб, тунги 02:00 да ишга чиқишлари кераклигини айтган. Кейин яна телефон қилиб, кечки пайт 21:00 ларда машина юборишини, ишга чиқишлари кераклигини айтган.
“Ўша куни ишдан эртароқ келиб, бироз мол боқиб, кирини ҳам ювди. Кейин бироз дам олди. Кейин ишхонасидан телефон қилишди. Шунда уларга соат тунги 02:00 да борамиз, дейишди. Қўнғироқ қилганлар шеригингни айтгин, келиб сен билан уйингда ёцин, деган. Шундан кейин соат 19:00 ларда хотинимнинг ҳамкасб шериги бизникига келди. Ухлашаётганида яна қўнғироқ қилиб, тезда етиб келинглар, машина боряпти, дебди. Тезда кўча бошига чиқиб туринглар, дейишгани учун шошилиб чиқиб кетишди. Орқасидан қайнсинглиси чиққанида ҳеч қанча ўтмасдан ёмон хабар келди. Айтишларича, дўконнинг олдига бориб, машина борди, дейишганида йўлнинг нариги томонига ўтаётганида Matiz ёки Spark келиб урган”, — дейди марҳуманинг турмуш ўртоғи.
Иминжон Мамажоновнинг таъкидлашича, хотинини ишдан ташқари вақтларда, айниқса, кечки пайтларда ишга чақириб туриш ҳолатлари кўп бўлган.
Жабрланувчи Энахон Бутақулованинг турмуш ўртоғи Ҳоким Жўраевнинг айтишича, аёли уйдан Муҳаммад Юсуф туғилгани куни муносабати билан гул экишга боришини айтиб, чиқиб кетган.
.jpg)
“Кечки пайт соат 17:00 ларда ишдан келди. Келиб уйдаги майда-чуйда ишларни қилди. Кейин кун кеч бўлди. Бир пайт кетаман деди. Нимага десам, Арофат ўртоғим қўнғироқ қилди, эртага Муҳаммад Юсуфнинг туғилган куни экан, гул экишга борар эканмиз, шунга эрта тонгдан чиқиб кетадиган бўлдик, деди. Майли, деб рухсат бердим. Кейин менга кечқурун ишга кетаётганда машина уриб юборгани ҳақида хабар келди. Эшитибоқ жияним билан бирга касалхонага бордик.
Бир нарсани тушунмаяпман, булар кечаси ўзидан ўзи гул экишга чиқиб кетмайди-ку. Кимдир ишга чақиргани учун борган. Ваҳоланки, олдин ҳам анча-мунча кеч қолиш ҳолатлари бўлар эди. Ишинглар давлат иши бўлса, нега график асосида ишламайсизлар, десам, раҳбаримиз шунақа экан-да, дерди. Ҳаттоки якшанба куни ҳам чақиришса, бориб ишлашарди. Бўлмаса шу ишларни душанба куни қилишса ҳам бўларди. Йўқ, уларга иш вақти бўлмаган”, — дейди Ҳокимжон Жўраев.
Ободонлаштириш бошқармаси шаҳар бригадаси бошлиғи Манзурахон Исмоилованинг айтишича, аёлларни бошқарманинг кадрлар бўлими бошлиғи улардан насия олинган маҳсулотларнинг пулларини олиш учун чақирган бўлган. Воқеа шунда юз берган. Аёллар ўша куни ишга жалб қилинмаган.
“Ишчиларимизни биз кечки пайтда ишга жалб қилганимиз йўқ. Шахсан мен кеча соат 16:00 ларда ишдан қайтиб, набирамнинг мазаси йўқлиги учун уйга кетгандим. Эрталаб келсам шу воқеа бўлганини айтишди. Эшитганимга қараганда, кадримиз Мактубахоннинг улар билан озгина алоқаси бор экан, шуни олиб чиқиб беринг, деганида олиб чиқаётган жойи экан. Менга кадримиз мана шундай деди. Мен уларнинг бригадириман, уларни ишга жалб қилмаганман. Суриштирсам бошқалар ҳам жалб қилмаган. Бу гаплар қаердан чиқди, ким билади, билмаймиз. Лекин мана шу ҳудудлар, шаҳар бизга қарайди. Қизларга бўлиб-бўлиб берганмиз”, — дейди Манзурахон Исмоилова.
.jpg)
Суҳбат давомида Манзурахон Исмоиловадан Мактубахон ва жабрланувчи аёлларнинг телефон рақамларини сўраганимизда телефонида кўриб, ёзиб олишимиз мумкинлигини айтди. Шунда қўнғироқлар тарихида 18:00 дан 18:25 оралиғида ЙТҲда жабрланган ва вафот этган аёлга қўнғироқ қилингани, аммо дастлаб аёллар жавоб бермагани, бироқ Арофатхон Жалолиддинова қайтиб қўнғироқ қилганидан сўнг у билан 2 дақиқа-ю 23 сония суҳбатлашганини кўриш мумкин.
Туман тиббиёт бирлашмаси шошилинч тез ёрдам бўлими врач-травматологи Бобур Имомовнинг айтишича, Энахон Бўтақулова шифохонага ўта оғир аҳволда олиб келинган. Зудлик билан операция столига ётқизилиб, уч соатдан ошиқ операция қилинган.
.jpg)
“Бизга ўша куни Тўлға маҳалла фуқаролар йиғинидан автоҳалокат натижасида тан жароҳати олган икки нафар фуқаро олиб келинган. Биттаси биологик ўлик ҳолда келди. Иккинчиси ўта оғир тан жароҳати билан олиб келинди. Шу беморни кўрганимизда иккала оёқда синиш, қорин бўшлиғи аъзолари лат егани, қон босими эса нол эканлиги аниқланди. Шундан сўнг зудлик билан бемор жонлантириш бўлимига ётқизилиб, барча реанимацион чора-тадбирлар амалга оширилиб, жарроҳлик столига олинди. Уч соат операция қилиниб, синган суяклар гипс қилинди. Бемор ҳозир яхши, ўзгариш бор. Ҳушига келган, анча тузук”, — дейди врач травматолог Бобур Имомов.
“Дарё” мухбири Марҳамат тумани ҳокимлиги Ободонлаштириш бошқармаси бошлиғи Адҳамжон Қўчқоров, бошқарманинг ободонлаштириш бўйича бўлим бошлиғи Ҳамиджон Ҳайдаровлар билан ҳам телефон орқали боғланди. Уларнинг иккиси ҳам олисда эканини, саволларга телефон орқали жавоб беришларини билдиришган.
Адҳамжон Қўчқоровнинг айтишича, қабристонда гул экиш ишлари 25 кун аввал олиб борилган. Қолган тозалов ишлари қабристон қоровуллари томонидан амалга ошириб келинган.
“Ўн беш кундан бери Муҳаммад Юсуфнинг таваллудига тайёргарлик кўриб келяпмиз. Иш вақтимиз эрталаб соат 08:00 дан кечки соат 17:00 гача. Бошқа пайт бирорта инсонни ишга жалб қилмаймиз. 25 кун олдин Муҳаммад Юсуфнинг қабристонини тайёрлаб бўлганмиз. Қабристонга борсангиз, кўрасиз. Одатда ҳамма кетиб бўлгандан кейин атрофдаги қабристон қоровуллари чойини ичиб бўлиб, супургини олиб, супуриб тайёргарлик кўришади. Кимдир чиқинди теради, яна бири музқаймоқ қоғозини. Ўша куни мен ҳеч кимни чақирмаганман, ҳеч ким уларни чақирмаган. Билмадим, нега ишга келишмоқчи бўлишган. Ким чақирганини эса мен билмайман”, — дейди Адҳамжон Қўчқоров.
.jpg)
Марҳамат тумани ҳокими Бобур Йўлдошев ҳам ҳеч кимга кечаси ишга чиқиш бўйича топшириқ бермаганини айтмоқда.
“Дарё” воқеалар ривожини кузатишда давом этади.
Изоҳ (0)