Самарқанд туманида фуқаронинг 6 бош қўйи бўғизланиб, эгасига таҳдидомуз хат қолдирилди. Вилоят ИИБ ахборот хизмати ҳолат юзасидан маълумот берди.
Хабарга кўра, 23 апрель куни туман ИИБга “Бадал” МФЙда яшовчи 1995 йилда туғилган Б.Ф. ариза билан мурожаат қилган. Унда 22 апрель кунига ўтар кечаси туманнинг “Бадал” маҳалласи ҳудудида жойлашган ўзига тегишли деҳқон хўжалиги ер майдонидаги қўйхонасига номаълум шахслар ғайриқонуний равишда кириб, қўйхонадаги 12 бош қўйдан 6 донасини сўйиб, 3 донасини яширин равишда талон-торож қилганини билдирган. Шунингдек, унга таҳдид сифатида хат ҳам қолдирилганини айтган.
Мазкур ҳолат юзасидан 23 апрелда Самарқанд тумани ИИБ ҳузуридаги Тергов бўлими томонидан номаълум шахсга нисбатан Жиноят кодексининг 169-моддаси 2-қисми “г” банди билан жиноят иши қўзғатилиб, дастлабки тергов ҳаракатлари олиб боришга киришилган.
Ҳозирда айбдор шахсларни аниқлаш юзасидан ИИБ тезкор ходимлари томонидан тезкор-қидирув тадбирлари олиб борилмоқда. Тадбирлар вилоят ИИБ назоратига олинган.
Изоҳ (0)